هاجمت الإعلامية ريهام سعيد الفنان بيومي فؤاد، بعد حديثه في نهاية عرض مسرحية “زواج اصطناعي” في موسم الرياض، والنقد الذي وجهه للفنان محمد سلام بسبب انسحابه من العمل تضامنا مع الشعب الفلسطيني.
وقالت ريهام سعيد خلال تقديمها برنامج “صبايا الشمس” المذاع عبر قناة الشمس: “ما ينفعش تنتقد محمد سلام لإن موقفه موقف محترم، ومينفعش تغلط في اللي عمل الصح”.
وأضافت: “بيومي فؤاد قال كلام مستفز، وأنا وضعي صعب لإن بطاقتي مكتوب فيها ممثلة، لكن إنت كده ضحكت على نفسك يا بيومي، والشعب السعودي على راسنا من فوق، إيه دخل ده في إنك رايح تقدم مسرحية تضحك؟ كلنا لنا الشرف نتصور مع السعودي والإماراتي واللبناني، إيه دخل ده في إن كان في مستشفى بينضرب وناس بتموت والدم سايح في كل حتة؟ إنت رايح تضحك بدليل إنك فنان كوميدي، وبدلت محمد سلام بكوميديان هو محمد أنور، وناس كتير شايفة مكانش يصح تضحك في الوقت ده، والأسبوع اللي محمد سلام إتكلم فيه كان وضع صعب جدا وما زال”.
وعلقت ريهام سعيد على جانب من حديث بيومي فؤاد على المسرح، أكد فيه احترامه لجمهور المسرحية قائلة: “يعني إنت احترمت ناس دفعت تذاكر علشان تروح مسرحية، ومش محترم الفلسطينيين ليه؟ 2 مليون ونص فلسطيني بيتقطعوا حتت مش محترمهم ليه ومش محترم شعورهم؟”.
وتابعت: “الفن لو مش هيقوم على إننا نحس بالناس، ولو الفنان معندوش إحساس بالآخرين يبقى مش فنان”.
ودافع الإعلامي عمرو أديب عن النجم بيومي فؤاد، بعد موجة الانتقادات التي تعرض لها بسبب كلمة ألقاها في نهاية عرض مسرحية “زواج اصطناعي” بموسم الرياض، انتقد فيها الطريقة التي انسحب بها الفنان محمد سلام من العمل.
وقال عمرو أديب خلال تقديمه برنامج “الحكاية” المذاع عبر قناة MBC مصر: “إيه اللي بتعملوه مع بيومي فؤاد ده؟ هو الراجل عمل إيه، وإيه الشتيمة القبيحة دي؟ ده لو عرض المسرحية في إسرائيل مكانش عملتوا معاه كده”.
وأضاف: “عايز أسأل ضميركم سؤال، لو إنت متضايق من بيومي فؤاد، وشايف إنه عبد للفلوس والمادة ومش شايف فلسطين، هل اللي إتعمل فيه النهاردة قد اللي عمله، وهذا العقاب الجماعي الأسطوري على كلمتين قالهم على المسرح؟”
وتابع: “أول إمبارح كان في سبع مطربين مصريين في أبوظبي بيغنوا ولا حد قرب لهم، وفي مصر أقيم عدد من الحفلات، إنما علشان في الرياض وأنا أتكلم بصراحة. دي ناس شغلتها تمثل وتعمل حفلة وتغني، وهاني شاكر وهشام عباس وإيهاب توفيق شغالين، هل بقوا خونة؟”
أكد عمرو أديب استمرار موسم الرياض قائلا: “يا جماعة موسم الرياض مستمر ولن يتوقف، وبصراح الموضوع مشبوه جدا، الموضوع مش بيومي فؤاد، ده راجل ممثل بنحبه ومصري، يروح هناك وسط الناس يلاقي بلده بتشتمه!”
كما أكد عمرو أديب أنه سيتصدى للدفاع عن الفنانين المشاركين في موسم الرياض بقوله: “أنا هدافع عن كل فنان هيسافر، وكل فنان بياكل عيش وبيشتغل في مصر أو خارج مصر، وأنا المحامي بتاعهم”.
وشهدت الساعات الماضية حالة من الجدل، بعد قيام الفنان بيومي فؤاد بمهاجمة الفنان محمد سلام في نهاية عرض مسرحية “زواج اصطناعي” بموسم الرياض قائلا: “من حقك أنك تعتذر عن المسرحية لكن مش من حقك أنك تغلط في فنك، إحنا مبنجيش علشان نضحك حضراتكم إحنا بنقدم فننا المصري إنتوا بتحترمونا وإحنا بنحترمكم جدا شيء عظيم أني أخرج اتصور مع شاب سعودي ومع سيدة سعودية وهي تعلم أني مصري أنا بشرف بلدي”.
وتابع: “أنا فنان مصري وليا الشرف جيت المملكة العربية السعودية وليا الشرف كتر خيركم كتر خيركم كتر خيركم، إحنا بنتعب وبنشقى عشان نقدم فن مش عشان نيجي نضحك لو الموضوع كده يبقى في فنانين من أيام نجيب الريحاني لغاية محمد أنور المفروض ينتحروا إحنا بنقدم فن”.
وكان محمد سلام نشر فيديو عبر حسابه بموقع Facebook قال فيه، إنه توقع أن يتم إلغاء موسم الرياض بسبب الأحداث التي تشهدها غزة، بعد قرار إلغاء مهرجانات كبيرة مثل القاهرة السينمائي والجونة، لكن ذلك لم يحدث فاضطر للاعتذار عن السفر، لأنه لن يستطيع أن يقدم كوميديا ويرقص، تزامنا مع ما تشهده فلسطين من أحداث مؤسفة.
وأوضح سلام أنه شعر بأنه لو فعل ذلك كأنه يساهم في قتلهم أيضا، وهو ما رفضه تماما، رغم يقينه أن القرار قد يأتي بنتائج عكسية له، ويؤثر على عمله ودخله فيما بعد، لكنه أصر، وقال: “مش هموت من الجوع”.