رد الفنان تامر عاشور، على الفنان عمرو مصطفى، بعد تصريحاته الأخيرة عنه في برنامج «حبر سري».
رد تامر عاشور
وكتب الفنان تامر عاشور، منشور عبر صفحته الرسمية على موقع التواصل الاجتماعي «فيسبوك» قال فيه: «رداً على عمرو مصطفى، أغنية الرك على النية، ألحان عمرو مصطفى وفي أي حفلة ومكان بقول كده والملحن اللي باعهالي المُقتَبِس الحقيقي، عمرو مصطفى مجبش سيرته نهائي مش عارف إزاي مع إنه عارفه من 8 سنين لما قفلنا الموضوع ده أنا وهو، في مكالمتنا مباشرة – وبعدين أنا مالي ده صِراع مُبدعين ويقدر ياخد حقه قانوني ويوقفها محدش منعه، أنا أداه على كلامه ده غير إن الاستعانة بعمرو مش صعبة واشتغلنا مع بعض أغنية انطق».
وتابع: «كل الحكاية إنه معرفش يجاوب على السؤال: الصناعة انهارت إزاي وأنت عمود من عمدان الصناعه؟ السؤال اللي مش هتلاقي له إجابة مهما توّهت الناس اللي كلهم قالولك، أنك مجاوبتش بمنتهى الوعي، وأنا الحقيقة كنت مُنتظر إجابتك علشان أقولك الصناعة فيها كام عمود غيرك وكام مُطرب عمل تاريخ وعلامات من غيرك ومنهم أنا، وكام مُلحن وشاعر وموزع اشترك في نجاح مطربين وإعلانات وتترات وكل حاجة حصلت عادي بدونك».
واستكمل: «احترمك واقدّرك أنت أستاذ كبير بس قلّيت في نَظر تلميذك لما اتكلمت في التلفزيون عن إن فيه حد عموما احترمك وكأنه حدث جلل لأستاذ كبير زيك».
وأضاف: «في النهاية أنت مُلحن كبير مقاما وفنّا وإضافه لأي مُطرب غيري – هي الظروف حكمت كده ولا تاريخي فيه عمرو والعكس صحيح – ومش هفوت الفُرصه دي إلا وأشكر كل الفنانين الكِبار المصريين المبدعين شعراء ملحنين موزعين اللي اتشرفت بالعمل معاهم على مدار 20 سنة وحطوني في مكانه انا مكنتش احلم بيها وسط الجمهور العربي كله اللي بنحاول نقدمه ابداع حقيقي مهما ذادت بنّا المناواشات الوارده التي لا تتخطى حاجز الأدب والصداقه والمحبه والود ولمصلحه نجاحنا واستمراريته بفضل الله ثُم فضلكم، اشكر اعظم فرقه موسيقيه بشتغل معاها جوه وبره مصر اللي بيخلوني قادر على “التصدير الدائم والمختلف ” للفن المصري الرائع بحضوري كفرد من تلاميذ لأساتذه كبار حقيقيين».
واستطرد: «اشكر مَصر حبيبتي فعلا بدون إدّعاء ولا مُذايده ولا حتى اغاني – جمهورها اللي على كل الأذواق اللي بيسمعوا كل حاجة وكل لون وكل خَبط ورزع وفي الآخر ياخدوا الحلو ويعيش معاهم ويصدروه، ويرموا الوحش وباب النجاح لأي فنان عربي».
واختتم: «اشكر بلدي السعودية وجمهورها اللي ضاف لتاريخي واسمي وتشكيل كيان محترم لحفلات عالميه حرفيا ومش من مره واحده بدأت هناك خطوات ومجهود وتعب ومُسانده وهكذا.. إلى أن تمت النجاحات الكبيره الحمد لله ومنها الى كل الدول العربيه اللي اعشق جماهيرهم وحبهم للفن المصري عموما الموضوع كبير قوي يا استاذ عمرو تيجي حضرتك يا استاذ في الآخر تقول عليا اني مثل حي لإستباحه جُمل لحنيه لناس عايشه بالباطل وعايز بعيونك الحلوه دي تشوف خير في الصناعة؟».
تصريحات عمرو مصطفى
وكان الفنان عمرو مصطفىى، رد على تصريح تامر عاشور، الذي أدلى بيه مؤخرا ورفض فيه وصف عمرو مصطفى حال صناعة الموسيقى المصرية حاليا بالانهيار، وذلك خلال لقاءه في برنامج «حبر سري»، حيث قال: «يا تامر في أغنية أنا عملتها لمصطفى صندل التركي، إنت أخذت اللحن والتوزيع الموسيقي، ونزلت الأغنية وكتبت عليها اسم ملحن تاني، والمفروض إنك داخل صناعة الموسيقى».
وتابع: «الصناعة أصبحت إن منتجي الأغاني بيسرقوا أغاني وألحان، وأنا لسه مسروق مني أغنيتين من مطربي المهرجانات، هل هذا لا يعني إن الصناعة تعرضت للتدمير، وهل يرضيك وجود المهرجانات وصورتنا خارج مصر، واختفاء أصوات مثل أم كلثوم وعبد الحليم».