خالد الصاوي في “حبر سري”: الفن أنقذني من الإدمان وندمت على عدم الانجاب.. وهل يترشح لنقابة المهن التمثيلية


حل الفنان خالد الصاوي ضيفا على برنامج “حبر سري” مع الإعلامية أسما إبراهيم على قناة “القاهرة والناس”.

وكشف خالد الصاوي العديد من الأسرار ورأيه في الزواج في سن متأخر وتعليقه على أزمة الفنانة منة شلبي الأخيرة وإمكانية ترشحه لمنصب نقيب المهن التمثيلية وهو ما سنرصده في الملخص التالي…

– ندمت على تأخري في قرار الزواج وعدم الإنجاب وكل الحاجات غير الطبيعية اللي عملتها في حياتي في أنى اتجوزت متأخر وأني مخلفتش والخلفة ملهاش علاقة بالسند والضهر ولكن تأخرنا في فكرة الخلفة لما عدى الوقت.

– فكرت في وقت من الأوقات أن أتبنى طفل ولكن لست متأكد من كون الفكرة صحيحة أم لا واللي يقدر يعمل كده ربنا يبارك له ولكن أنا متحرك وبسافر.

– مراتي نفسها بتشتكي أني طول الوقت في شغلي مش في البيت وكمان هيبقى في مسئولة زي وجود طفل وابقى مش قد المسئولية، وأخاف اعملها وأكون مش قدها.

– مش متأكد أن دوري في فيلم عمارة يعقوبيان رفضه محمود حميدة أم لا ولكن أعرف أن هناك ممثلين كبار قلقوا من الدور والنهاردة أن شايف أن عندهم حق.

– مش ندمان على دوري في عمارة يعقوبيان ولكن الممثلين اللي رفضوا عندهم حق وكل حاجة كنت بعملها لما كبرت قلت 50% من كل اللي عملته في حياتي الشخصية.

– مستحيل أرشح نفسي نقيب الممثلين ولا عايز ابقى وزير ولا عايز ابقى أي حاجة تسبب إعاقتي عن أني اكون فنان مستقل.

– لا أخاف من المسئولية ولدى القدرة على تحمل المسئوليات وأقدر اشيل 100 ألف مسئولية ولكن أنا مش عايز اضيع يوم إلا وأنا بمثل أو أبدع فيه وأعمل حاجة فيها فن.

– حاولت اتواصل مع منه شلبي بعد أزمتها الاخيرة ومقدرتش واحنا أصحاب جدا وأعرفها من أول مرة اشتغلت فيها سنة 2000 وكانت لسه صغيرة.

– الفن انقذه من الجنون والإدمان والإجرام فالفن كان حائط صد أمام هذه المخاطر من ناحية وتأثير والديه عليه من ناحية أخرى.

– أصيبت بفيروس سي وتعالجت منه في مصر مش بره وتعالجت في بلدي وكمان كان عندي مشكلة صحية أن صوتي فيه مشكلة وبيحصل لى كل حوالي ست شهور مع تغير الفصول بيحصلي فترة تعب في صوتي وبتابع مع أطباء مميزين.

– كان عندي مشكلة انزلاق غضروفي حصلي من سنة ودي أثارها عليه وعلاجها الراحة والعلاج الطبيعي، ولكن أنا في اوردرات بشتغل فيها 12 ساعة و14 ساعة ولم تعطلني.


Beirutcom.net