انتقدت الفنانة حورية فرغلي مسابقات ملكات الجمال التي تقام في السنوات الأخيرة، بالمقارنة بالمسابقة التي شاركت فيها عام 2002 وفازت بلقبها.
وقالت حورية فرغلي خلال استضافتها في برنامج “البيه والهانم” المذاع عبر قناة القاهرة والناس: “أنا كنت عضو لجنة تحكيم في مسابقة ملكة جمال مصر اللي فاتت، وعضو لجنة تحكيم ملكة جمال العرب، والمسابقات مش زي أيامي أنا سنة 2002”.
وردا على سؤال ما الاختلاف الذي لمسته، قالت حورية فرغلي: “زمان كان الجمال مش كل حاجة، لازم المتسابقة تبقى مثقفة وحلوة، وجسمها متناسق وبتلعب رياضة”.
وروت حورية فرغلي أحد المواقف التي تعرضت لها خلال مشاركتها في لجان التحكيم بقولها: “من كام سنة طلبوني أكون عضو لجنة تحكيم ملكة جمال مصر، وسألت البنت لو رجع بها الزمن لعصر الفراعنة تحب تكون أنهي ملكة وإيه السبب؟ لكن كانت مش فاهمة عربي مع إنها مصرية، وطلبت أقول السؤال بالإنجليزي”.
يذكر أن حورية فرغلي قدمت مؤخرا مسرحية “رابونزل بالمصري” للأطفال، ولعبت فيها دور أميرة ديزني “رابونزل”.
وقالت حورية فرغلي في تصريحات صحفية عن المسرحية: “الشغل مع الأطفال مش سهل خالص دي أول مرة اشتغل معاهم، كنت قلقانة لأني ظهرت في المسرحية بشعر أسود، هما عارفين القصة وحافظينها وكنت متخيلة هيقولولي شعرك مش أصفر زي الشخصية، وأنا مينفعش أخلي شعري أصفر مش حلو عليا ومش لايق معايا بس قلنا إن الساحرة غيرت لون شعري عشان ميبقاش السحر قوي”.
وتابعت حورية فرغلي متحدثة عن الشخصية: “الوقوف على المسرح ليه رهبة خاصة مش زي التليفزيون والسينما، لكن أكتر حاجة شدتني في الشخصية هي البراءة، هي بتشبهني في برائتها وأنها تعرضت للظلم في حياتها”.
وكانت حورية فرغلي روجت لمسرحيتها “رابونزل بالمصري” كاتبة: “انتظروني لأول مرة على المسرح مع الأطفال قمة سعادتي وأنا أكون سبب في سعادة الأطفال”.