كشفت الفنانة إيناس مكي سبب عدم تعاونها مع شقيقها الفنان أحمد مكي في أي عمل فني، وردت على كل الشائعات التي يطلقها البعض عليهما.
وخلال لقائها في برنامج “المنسي” عبر قناة “هي” من تقديم إنجي هشام طلبت إيناس مكي من الجمهور عدم تكرار هذا السؤال وعدم نشر شائعات لا أساس لها من الصحة قائلة: ” ياخونا أرحمونا، أنا مدركة أن في حاجة اسمها ضريبة الشهرة لأني بنت المهنة من 26 سنة، طبيعي لو أنتي اسم مشهور وأخوكي ميجا ستار الناس هتفضل ترغي في نفس المنطقة طلعونا متخانقين وإحنا مش متخانقين، طلعونا أن إحنا واخدين قرار منشتغلش مع بعض، والله ما حصل، طلعونا أن في بينا مشادة وهو ضهري وسندي وراجلي اللي في الدنيا، وصلت أن ليه مفيش صور بينكم”.
وتابعت: “وصلت أن حد قالي في برنامج ليه مش بتطلبي من أحمد يشغلك؟ ليه أنا إيناس مكي هو لو هيحتاجني هيطلبني، وهو عمره ما هيشاورلي على دور إلا لو عارف إنه هيعمل “بوم” وممكن يبقى شايف أن في مليون حاجة لأ إيناس تستاهل أحسن من كده مجبهاش تكرر، الفمرة الأساسية أن مفيش حاجة مناسبة نعملها مع بعض”.
ووجهت لها مقدمة البرنامج سؤالا حول عدم تقديمها شخصية “مربوحة”، لكن إيناس مكي اعترضت وقالت إن هذه الشخصية لا تناسبها قائلة: “مينفعش أطلع في دور مربوحة أطلع حبيبته ومراته وأنا أخته اللي أكبر منه؟ اللي كان متاح أني أعمل شخصية من شخصيات لكن حسينا وبعدين عملتها كتير فين الجديد اللي هقدمه؟ يمكن في اللي جاي إن شاء الله”.
على جانب آخر، تشارك إيناس مكي في بطولة مسلسل “الليلة كبيرة”.
وتحدثت إيناس مكي في تصريحات صحفية عن المسلسل، وقالت إنها تحمست لتقديم الشخصية التي طرحت عليها بسبب فكرة العمل المختلفة والمميزة بالإضافة الي الكوميديا الجيدة التي يشتاق لها الجمهور المصري والعربي.