تداول عدد من رواد مواقع التواصل الاجتماعي، فيديو من حفل زفاف البلوجر آية مكرم، التي أثارت غضب متابعيها في حفل زفافها وكان النجم المصري تامر حسني قد فاجأها بالحفل ودخل متنكراً على انه مصور.
ورد الفنان تامر حسني، لأول مرة على الفيديو، وكتب عبر خاصية “القصص القصيرة”، على حسابه الرسمي بموقع “إنستغرام:”آية غير إنها بنت ناجحة ومحترمة وطموحة، هي أصلا من محبيني من وهي طفلة، ودايما كان بيجيلي منها رسايل من صغرها إن أمنيتها إني أغني فى فرحها، وبعتتلي من فترة إني بالنسبة لها مثل أعلى في النجاح، وبتستمد مني طاقة إيجابية بتفرحها وبتنجح بيها”.
وأضاف :” “تخيل لو النجم أو الفنان اللي هو مثلك الأعلى ميكنش عندك مقدرة مادية إنك تجيبه يحييلك فرحك، ولأن الفنان دا صدق طاقتك اللي وصلته من حروف صغيرة، ولكن صادقة كل الصدق، فتساعد الظروف هي الأخرى ويتم إلغاء ميعاد مهم عندي من أطراف أخرى، لتأتي الظروف وتساعد، وأصبح فاضي فى هذه الساعة، فأذهب دون مقابل لفرحة آية الطفلة اللي كبرت وطول عمرها بتتمنى اللحظة دي، من خلال حروف بسيطة، فأروح وافرحها هي وعريسها الجميل الشاب الطموح المحترم هيمن”.
وتابع :” “اللى محبش مثل أعلى واتعلق بيه من صغره ولقاه جانبه بيحققله أمنية من أمنيات حياته، مش هيفهم الكلام دا، بس دي علاقة صدق في الطاقات الحب، بيألف قلوبها ربنا، عشان الناس تفرح، وفي فرحة بتخليك مش في كامل وعيك، من كتر مانت مش مصدق، ودا أنا قولته فى أغنية “يافرحة”، “يااااه مش مصدق، ربنا يرزقكم كلكم الفرحة دي، مبروك لحبايب قلبي اخواتي الصغيرين آية وهيمن، حب الناس الطيبة لفرحتكم”.
وتعرضت “آية” لهجوم شديد بسبب محاولة إبعادها لطفلة موجودة على “الاستيدج” بمجرد ظهور تامر حسني، وجاءت التعليقات: “هو إنتي زقيتي البنت الصغيرة عشان عاوزة تسلم على تامر”، وحرام تزقي البنت الصغيرة في قلبها كده”، “حرام عليكي البنت الصغيرة” ، “البنت الصغيرة صعبت عليا” وغيرها من التعليقات.
وهاجمها الجمهور مرة أخرى بسبب رقصها مع تامر حسني على الاستيدج وتجاهل زوجها، وجاءت التعليقات: “هو إنتي نسيتي العريس ولا إيه”، و”أوفر أوي”، و”إنتي جنبك راجل إيه الأوفر ده”، و”ولا كأن جوزك موجود” وغيرها.
بعد الهجوم عليها، ردت آية مكرم على فيديو الطفلة قائلة: “أظن الفيديو ده أكبر دليل وحابة الناس تركز أوي على الهجوم اللي حصل ع الاستيدج من مصورين وناس كتير، وده أكبر دليل وحابة الناس تركز أوي على الهجوم اللي حصل ع الاستيدج من مصورين وناس كتير”.
وتابعت: “لما شفنا المنظر ده أنا وهيمن قولنالها تنزل بسرعة، اتفرجوا وشوفوا واحكموا بنفسكوا، لو شوفتي بنتك في مكان عليه هجوم كده هتعملي إيه؟ دي بنت أختي وخايفة عليها أكتر منكم وأظن الفيديو أثبت ده، ركزوا هتلاقوني قلتلها انزلي بسرعة وهيمن قالها كده وإيده باينة وهو بيشاورلها”.
وعبر خاصية القصص القصيرة “الاستوري” عبر حسابها الرسمي بموقع إنستجرام، كتبت “آية” لزوجها: “بحبك وهتفضل في نظري أحن وأعظم وأجمل راجل في الدنيا، ربنا ما يحرمني منك أبدا”.
وتابعت: “فرحة عمري اللي جت بعد سنين تعب ومش هسمح لحد يضيع علينا الفرحة دي، حقك عليا يا حبيبي”.