كشف الفنان المصري محمد عطية عن اسم شخصيته الي سوف يجسدها بفيلمه السينمائي الجديد ونشر صور عبر حسابه في انستغرام وارفقها بتعليق :”عادل الشامى … ده إسم الشخصية اللى بلعبها فى فيلم ( ضيوف شرف ) .. تفتكروا بتشتغل ايه ؟.
ويشارك في بطولة فيلم “ضيوف شرف” عدد من الفنانين اللبنانيين منهم: ستيفاني عطا الله، فؤاد يمين، سيرينا الشامي، جوزيف زيتوني، وهو من تأليف وإخراج سامي كوچان.
وفي ذات السياق طرح الفنان محمد عطية “كليب جديدا” يعيد فيه تقديم أغنيتي عبد الحليم حافظ “تخونوه وموعود” مع المطربة كارلا شمعون التي تغني باللغة الإنجليزية.
والأغنيات هي موعود، تخونوه، Unfaithful، Someone Like You و Kisses Back.
كشف الفنان المصري محمد عطية من خلال منشور طويل كتبه عاى حسابه الرسمي على فيسبوك عن تفاصيل يرويها للمرة الأولى عن حياته الشخصية.
وقال محمد في منشوره: “بما إنى بقيت برتاح هنا فحابب افضفض معاكم بحاجة عمرى ما كنت هكتبها إلا بعد ما وصلنى منكم الدعم اللى أنا حاسه مؤخرا … أنا على مدار سنين من ساعة ما ظهرت فى ستار اكاديمي و بعد دخول السوشيال ميديا فحياتنا بشكل مؤثر جدا … كل اصحابى … كلهم .. كانو بينصحونى ان مش كل افكارى او شخصيتى لازم تكون موجودة علي السوشيال ميديا .. خصوصا ان الشائع عندنا إن الفنان قدوة و انه لازم يكون شخص متكامل قدام جمهوره و دى حاجة انا ما عرفتش اعملها … حاولت بس ما عرفتش … انا مش متكامل و بغلط و ممكن اعمل حاجات ما تناسبش افكار ناس من الجمهور او يكون ليا أراء غير المتعارف عليها عند بعض الناس … ده عشان انا غيرك و انت غيرى و ما حدش شبه حد … انا لا عمرى كنت عاوز ابقى قدوة او حتي بقول كلام يتقال عليه ده بطل .… انا كل اللي بعمله اني مدرك اني مش ملاك .. اه خسرت ناس كتير … بس اللي فضلوا. يدعمونى … عارفين ان علي السوشيال ميديا زي ما هتشوفنى في الحقيقة .. بكل العيوب اللي ممكن تكون بتظهر منى … عارف انه فنيا ده مش صح … بس انا بصراحة كده مرتاح اكتر … و حاسس ان اللي بيحبني عارفنى و مش محتاج امثل قدامه او أدعى شخصية غير شخصيتى … اسهل حاجة ان ادعى المثالية علي السوشيال ميديا .. او اجيب حد يمسكلى صفحتى و يكتب اللي الناس عاوزين يقروه .. بس انا مش مثالى وفيا عيوب زيك و زى كل الناس و حابب العلاقة اللي حاصله مع الناس الليً عاملينلي فولو … هما عارفين اني شاب و بهبل و بضحك و بزعل و بضعف و بشتم و انا عارف انهم مش هيتصدموا فيا لو قابلونى صدفة في اي مكان ..في النهاية انا حابب اقول لكل شخص استفز منى عشان أى حاجة عملتها مخالفة لافكاره او عاداته و تقاليده انا مش قصدى تضايق … انا كل اللي بعمله انى بكون انا … و انا مش معصوم من الخطأ … صباح الفل”.
وفي منشور اخر عبر انستغرام كتب عطية:”كلنا عندنا فى حياتنا نقطة كنا واصلين فيها لمرحلة من النجاح أكتر من أي وقت سواء فى شغل أو علاقة أو أي حاجة تانية .. و دايما النقطة دي كل ما بتبعد كل ما بنفقد الثقة في نفسنا … و في قدرتنا على إعادتها تاني .. و بتبدأ تنسي إن إنت نفس الشخص اللي قدر يوصل للنقطة دى … أحسن نسخة منك .. و بتحاول تعيد نفس النجاح ده تانى بنفس الطرق بس ما بتنجحش… فتبدأ تلوم كل العوامل إلا نفسك .. و بتبدأ تتحول أنجح مرحلة في حياتك للعنة .. و خصوصا لما تلاقى اللى حواليك بيفكروك بيها .. مرة بهزار مرة بجد و مرة بلوم مرة بسخافة فتلاقى نفسك بتطلع منك إبتسامة صفرا … و تبدأ تدخل فى دايرة إحباط .. النقطة دى كانت بالنسبالي هى ستار أكاديمي .. دي أنجح مرحلة فى حياتى .. دخلت فى كل الدواير اللي قلتها فوق .. و سمعت هزار و جد و جمل من نوعية ( إنت لسه عايش /. ياااه .. إلخ ) … حسيت فى أوقات كتير باللعنة دى … لحد ما وقفت مع نفسي و إستوعبت إنى نفس الشخص … و إن زى ما قدرت أوصل للنقطة دى فى حياتى أقدر أوصلها تاني .. بس لازم أكون مدرك الصعوبة و إختلاف الظروف و العوامل و زى ما لقيت طريقة قبل كده أوصل للنقطة دي .. لازم ألاقى طريقة تانية تناسب الظروف الحالية عشان أوصلها تانى .. أول حاجة إنى بيني و بين نفسي لازم أكون نسخة أحسن من النسخة اللي نجحت النجاح ده و بعدها أبدأ أدور بيها على نجاح أكبر .. و إنى لازم أبطل ألوم الظروف … الظروف موجودة و هتفضل موجودة.. ولازم أكون صريح مع نفسي و أعرف حجمى الحالى عشان أبدأ منه و ما أبدأش من وهم.. و قبل كل ده لازم أبقى مؤمن بنفسي و مقتنع إنى أقدر أعمل ده تانى … بحاول حاليا و لو فشلت هحاول تانى و تالت … أنا نفس الشخص اللي عمل النجاح ده مرة .. أنا نفس الشخص اللى أقدر أعمله تانى .