تعاقد بيتر ميمي، مخرج فيلم «حرب كرموز» الذي يعرض حاليا، على فيلم «حملة فرعون» المقرر عرضه بصيف 2019.
وأكد ميمي عبر الحساب الشخصي له على موقع «إنستغرام» أن الفيلم سيكون أضخم إنتاج في عام 2019 وأنه مقتبس من فيلم «الساموراي السبعة».
وعن اقتباس الأفلام من أفلام أخرى استعرض ميمي عددا من الأفلام المقتبسة من أفلام أخرى.
وقال: المفروض إن شاء الله عندى فيلمين الفترة اللى جاية وحبيت أقول كلمتين قبل الخبط والرزع والهبد والهرتلة بتاعت العيال الجامدة هما كالتالي:
١- سنة ١٩٥٤ تم إصدار فيلم (الساموراي السبعة) في اليابان من إخراج (اكيرا كوروساوا) بيحكي عن قرية يحكمها قطاع الطرق وأهلها استعانوا بشخص قام بتجنيد ستة رجال آخرين لمحاربة العصابات.
٢- سنة ١٩٦٠ قام المخرج الأمريكي (چون ستورجس) باقتباس القصة في فيلمه (العظماء السبعة) the magnificent seven لـ(يول براينر) و(ستيڤ ماكوين) بس الموضوع بقى رعاة بقر وكده.
٣- سنة ١٩٨٠ المخرج (چون موركامي) اقتبس الفكرة لكن في الفضاء في فيلم (battle beyond the stars).
٤- سنة ١٩٩١ تم إصدار فيلم (شمس الزناتى) للمخرج (سمير سيف) ومن تأليف (مجدى هداية) بطولة (عادل أمام ) و(محمود حميدة).
٥- سنة ٢٠٠٤ تم إصدار مسلسل الكرتون (الساموراى السبعة) في اليابان.
٦- سنة ٢٠١٦ تم إصدار فيلم (العظماء السبعة) من إخراج (أنطوان فوكوا) بطولة (دنزل واشنطن) وتأليف (ريتشارد وينك).
وقال: “المهم أنا مش عايز أقول إن فكرة الـ (remake) أو الاقتباس موجودة بس عايز أقول إن في ٢٠١٩ إن شاء الله استنوا فيلم (حملة فرعون) مستوحى من الساموراي السبعة وإن شاء الله مفترض يكون اضخم إنتاج في ٢٠١٩ ربنا يكرم ويكون عمل محترم وشكل مختلف من أفلام الأكشن».