كانت قد اثارت المخرجة المصرية إيناس الدغيدي الجدل في الوسط الفني حينما قالت خلال لقائها في برنامج “القرار” من تقديم نادية الزعبي عبر قناة “الغد”: “عشت المساكنة مع جوزي قبل ما أتجوزه قعدت 9 سنين بحبه، مش فاكرة عشت المساكنة كام سنة لأن الموضوع من زمان” وأكدت إيناس الدغيدي أنها لم تخض تجربة الزواج العرفي من قبل.
وفي هذا السياق تعرضت الدغيدي لهجوم حاد وانتقد الشيخ خالد الجندي، عضو المجلس الأعلى للشؤون الإسلامية، إثارة موضوع المساكنة من قبل البعض، واصفا المساكنة بأنها الترجمة الحديثة لكملة زنا
وقال خالد الجندي خلال تقديمه برنامج “لعلهم يفقهون” المذاع عبر قناة dmc: “البعض يثير أمور غريبة مثل قضية المساكنة، والمساكنة هي الترجمة الحديثة لكلمة زنا، يعني واحدة تقعد مع واحد وهي مش مراته وهو مش زوجها”.
وأضاف خالد الجندي: “دلعوا الخمرة وقالوا مشروبات روحية، ودلعوا البيرة وقالوا مشروب للطاقة، ودلعوا الزنا وقالوا مساكنة، ودلعوا الحشيش وقالوا علاج بالأعشاب، ودلعوا الرشوة وقالوا تيبس، إيه الكلام الفارغ ده”.
وتابع: “اتقوا الله يا جماعة، ستحاسبون بين يدي الله يوم القيامة”.
هاجمت الإعلامية مروة صبري المخرجة إيناس الدغيدي بسبب تصريحتها الأخيرة عن المساكنة وأنها خاضت هذه التجربة قبل زواجها
وقالت مروة صبري في برنامجها “قعدة ستات”: “طالعة بتقولي أنا عشت المساكنة قدام الناس كلها، إذا بليتم فاستتروا، ربنا سترني مطلعش أنا أفضح نفسي وأقول كده قدام الناس كلها”.
وتابعت مروة صبري: “صدمة كبيرة لكل الناس بعد ما سمعت التصريحات دي ويمكن الناس واخدة على أن المخرجة إيناس الدغيدي جريئة وصريحة وحرة في تفكيرها ولكن مش للدرجة دي في حاجات مينفعش، في حاجات ممكن أسيب مساحة لأني أكون معاكي أو ضدك وفي وقت وكلام وتصريحات وإجابات تودي في داهية”.
وأكملت مروة صبري: “حضرتك مش محتاجة تريند خالص أنا عارفة أنك مبتحبيش تطلعي في البرامج وعارفه انك بترفضي إذا إنتي مش التارجت بتاعك تقولي حاجة تعملي تريند زي معظم الفنانين والفنانات اللي بيحبوا يطلعوا يعملوا بلبلة حواليهم عشان الناس والمواقع تجيب سيرتهم إنتي مش كده، وحتى لو كانت دي قناعاتك وإنتي شايفة أن دا تفكيرك اللي هو شاذ عن المجتمع والحياة لا يصح أنه يتقال مفيهوش اه أو لأ مرفوض جملة وتفصيلا،عيشتي المساكنة إنتي حرة داري على نفسك”.