حلت النجمة مي عز الدين ضيفة على برنامج “صباح العربية”، لتعود بعد فترة طويلة من للقاءات التليفزيونية بعد غياب.
وجاءت أبرز تصريحات مي عز الدين في البرنامج:
أنتم بتوحشوني، بس الابتعاد دا بيبقى عشان طاقة الإنسان، لما بنركز في كذا حاجة، في الشغل وفي اللقاءات ووسائل التواصل الاجتماعي، كان في توقيت حسيت إن كدة كتير، بياخد من الطاقة.
– اطلع واتكلم لما يبقى في عندك عمل، في شيء تتكلم عنه، لكن في المطلق كدة حسيت إنه كتير، فقللت شوية حلوين.
– كل حاجة وليها توقيت، يارتني جربت أعمل مسرح من بدري، ماتطرحش الفكرة علي قبل كدة، والتوقيت اللي بدأت فيه ومشواري الفني كله كان المسرح ابتدى يبقى مش موجود، بتتحولي لما بتطلعي على المسرح، وحشني صوت الناس وهي بتضحك، انك بترسم بسمة على وجه المشاهد، دا نفسيا إحساس حلو اوي.
– أنا بحب أدوار الكوميديا، وقبلت مسرحية “زواج اصطناعي” لأني حسيت أن الدور كوميدي ومهم جداً للجمهور، في وقت ممكن نلاحظ فيه أن الضحك والكوميديا بالنسبة لهم ابتدوا يبقوا مش موجودين في المسرح.
– حسن حسنى اتعلمت منه الكوميديا وأعمالي معه بعتز بها جداً، ووحشني الشغل مع يسرا وتامر حسنى ومحمد سعد، وبفضل أشتغل مع ناس بحبهم، وأتمنى العمل معهم قريباً.
– مؤخرًا الضحك بقى صعب، والجمهور نفسه مبقاش ميال للكوميدي، والفنان غصب عنه لما بيعمل حاجة كتير بيبقى عايز يغير، وأنا مبعرفش أمثل كذا حاجة في وقت واحد، وكونك تبقي بطلة مسلسل ويتباع باسمكِ الكلام ده عايز تركيز جدًا في الأول، لأنك داخلة منطقة جديدة عليكِ، وبصراحة أنا اتبسطت أوي في تمثيل التليفزيون.
يذكر أن مي عز الدين أعادت تقديم مسرحية “زواج اصطناعى”، للمرة الثانية بالمملكة العربية السعودية، ضمن فعاليات موسم جدة، تحت شعار من جديد، ويشاركها البطولة كل من بيومي فؤاد، محمد أنور، مصطفى غريب، وكان العرض الأول لها في موسم الرياض.
وتدور أحداث مسرحية “زواج اصطناعي” حول شخصية شروق وفاروق، اللذان يتعرضان لأزمة في ليلة زفافهما، مما يدفعهما للجوء لخبير علاقات عاطفية، الذي يستخدم معهما تجربة حديثة بواسطة الذكاء الاصطناعي.
وشاركت مي عزالدين في الموسم الرمضاني 2023في مسلسل “سوق الكانتو”، بطولة أمير كرارة، تأليف هاني سرحان وإخراج حسين المنباوي، ودارت أحداثه في حقبة زمنية قديمة تعود إلى عشرينيات القرن الماضي، في السوق بمنطقة وسط البلد، وشارك في العمل كل من فتحي عبدالوهاب، أحمد صلاح حسني، ثراء جبيل، محمد عبدالعظيم، سلوى عثمان، محمود البزاوي، وضياء عبدالخالق.