كشف الفنان حسام حبيب حقيقة الأخبار المتداولة بدخول الفنانة شيرين عبدالوهاب المصحة، موضحًا أنها تمر بحالة نفسية سيئة.
ورد حسام حبيب على هذه الأخبار المتداولة بدخول شيرين عبدالوهاب المصحة قائلًا: «كل دا كلام غلط، شيرين كويسة وزي الفل، هي بس حالتها النفسية وحشة بسبب اللي عملوا أخوها فيها».
وعلق حسام حبيب على تصريحات شيرين الأخيرة بعدما أكدت تصريحاته في أزمته مع شقيقها محمد عبدالوهاب: «أنا طبعا بشكرها أنها وضحت للناس إني كلامي صح، وكمان مبسوط جدا إنها طلعت اتكلمت، مش عشان اتكلمت عني لا خالص، ولكن عشان طلعت وتحررت، لأني عارف الضغط النفسي اللي عليها عامل إزاي».
وأضاف «حبيب»: «والله يكون في عونها، ومتعاطف معاها جدا جدا، وبدعيلها ربنا يكرمها ويوفقها ويعوضها عن كل اللي حصل، وإن شاء الله دي تكون بداية جديدة ليها فيها كل خير يا رب».
وكشفت شيرين عبدالوهاب حقيقة أزمتها مع شقيقها محمد عبدالوهاب، وتصريحات حسام حبيب عن هذه الأزمة، وذلك من خلال مقطع صوتي ببرنامج «الحكاية» المذاع عبر قناة «Mbc مصر».
وأضافت: «عايزاكم متصدقوش أي حاجة من محمد عبدالوهاب وإن شاء الله الأغاني لما تنزل تعجبكم، بالرغم من أن المحكمة حكمت والقضاء المصري أن عقدي انتهى مع روتانا لكن هم لسه رافعين قضايا وموقفين الدنيا كلها وأنا واثقة في قضاء بلدي، واضطريت أرد لأني لقيت السوشيال ميديا مقلوبة».
وتابعت: «التصريح اللي نزل من محامي محمد اللي مستولي على السوشيال ميديا ومضاله على عقد بيخليه يستفيد من السوشيال ميديا بتاعتي، وفيه أغاني جميلة جدًا جدًا عاملينها وشوية حاجات بتخلص عشان المشاكل مع الشركة المنتجة، لأن في حد كمان قاصد يقعدني في البيت وبنخلص الحاجات دي».
وأكملت: «مش عايزة أضايقكم لإني عارفة أن كل واحد فيكم عنده مشاكل وهموم، وكل شوية شيرين شيرين والفترة اللي فاتت مكانش ليا تصريحات وانتوا أهلي وسندي وبتردوا غيبتي وبتقفوا لي وكمان بعد إذنكم في بيان رسمي في مكتب المحامي قنطوش وياريت ما تصدقوش غير البيانات اللي بتبقى تصريح مني شخصيا غير كده دي أكاذيب بشكركم يا حباييي وربنا يخليكم ليا».