علق المؤلف محمد صلاح العزب على تعديلات المخرج هادي الباجوري في سيناريو مسلسل سفاح الجيزة الذي عُرض مؤخرًا على منصة شاهد الرقمية.
وقال محمد صلاح العزب خلال تصريح خاص لـ القاهرة 24: هادي الباجوري التزم بالسيناريو في الحلقات الأولى، ولكن غيّر في آخر حلقتين، وعمل حاجات غريبة، اخترع خط كامل لزوجة المنتج عشان تمثل، اللي هي بتاعت أوبر، وهي أصلًا مش في الأحداث الحقيقية.
وأضاف: وجاب دكتور نفسي، وأنا طول المسلسل شارح الحالة النفسية للسفاح بشكل فني، وهو فجأة جاب ممثل عمل نفسه دكتور نفسي، وخلاه يقعد يتكلم كأنه في برنامج ويحلل نفسية السفاح بشكل مش فني على الإطلاق، وده ضايقني جدًا، أنا معنديش مشكلة تغير بس مش كده.
وأردف محمد صلاح العزب: هو مش من حقه يغير في الورق، فيه قواعد ثابتة، في الشغل في حاجة اسمها رؤية وفيه حاجه اسمها إنه يغير عشان يقعد يجامل ناس ويخترع في خطوط درامية، وأنا قدمت ضده شكوى لنقابة المهن السينمائية بعد عرض المسلسل مباشرةً.
وأردف المؤلف محمد صلاح العزب: أنا مكنتش موافق من الأول على هادي الباجوري؛ لأنه معملش أعمال تشبه لمسلسل السفاح، كان عنده فيلم اسمه وردة اللي كان شبه الفيلم بشكل من الأشكال ولكن حقق فشل ذريع، وأنجح عمل عنده هو فيلم هيبتا لأن الفيلم بيضم 8 فنانين كل ممثل فيهم بيشيل فيلم أو مسلسل لوحده، وكليب حبيبتي لحسن شاكوش اللي حقق أرقام مشاهدات عالية، وكان بالنسبة ليّا إنه مخرج كليبات وإعلانات شاطر بس، فكنت متخوف إنه هيجي يبوظ الشغل والورق.
أما عن إمكانية وجود أحمد فهمي في الجزء الثاني من مسلسل سفاح الجيزة، اختتم حديثه قائلًا: أحمد فهمي خلاص دوره انتهى، هييجي يعمل إيه، والقصة الحقيقية متحتملش إن ده يحصل، والمفروض المسلسل مستوحى من قصة حقيقية.