كشف الشاعر الغنائي أمير طعيمة عن كواليس دويتو اغنية”من أول دقيقة” الذي جمع الفنانة اللبنانية إليسا بالفنان المغربي سعد لمجرد والمتصدرة الترند بالمركز الاول على يوتيوب اذ انها اقتربت لتحقيق المليون رقم 35 بنسبة عدد المشاهدات وتصدرت ايضاً الترند العالمي بالمركز الاول منذ يومين.
وقال “طعيمة” في تصريحات خاصة لموقع “مصرواي”: “بداية المشروع كانت فكرة عند إليسا، إن هي بتفكر تعمل حاجة كلاسيك هي وسعد لمجرد، وأنا طبعا عجبتني الفكرة جدًا، وقولتلها نعمل كده علطول، لكن الموضوع خد الوقت، لإني كنت فترتها في البروفات النهائية للمسرحية اللي أنا كاتبها وبنتجها اللي هي جوازة معفرتة في السعودية، وأول ما رجعت ابتديت اشتغل فيها على طول، والموضوع أخد شهور”.
وتابع: “بعد كده أنا كملت وصلت لفكرة مبدئية، كلمت رامي واتقابلنا عند الموزع أحمد إبراهيم، وابتدينا ورشة كلنا، ومتابعين مع إليسا ومع سعد، واشتغلنا فيها كتير، دايما الدويتوهات بتبقى أصعب حاجة فيها إن تعمل أغنية دويتو، بيبقى فرق في مساحة الصوت بين الراجل والست، ده طبيعي جدا في أي مطرب ومطربة، فعشان تبقى الناس سامعة سعد في أحسن مكان صوته فيه وعشان تبقى سامعه إليسا في أحسن مكان صوتها فيه، ده استدعى إن ساعات نبقى مخلصين والأغنية إحنا سامعينها مع بعض، أنا ورامي وأحمد إبراهيم حلوة، بس بيبقى حد فيهم مش ببغني وهو مرتاح، فكنا بنرجع نغير اللحن، وعلشان نغير اللحن نغير الكلمات، عشان نطلع بجملة جديدة مختلفة”.
وأضاف: “قعدنا في الأغنية كتير جدا، مش الوقت الطبيعي اللي بنقعده في أي أغنية عموما، يعني من الأغاني اللي أخدت مني وقت كبير قوي، أنا بدأت فيها في شهر 12، والفاينال اللي نزلت بيه للناس ده كانت خلصت قبلها بكام يوم يعني، فخدت مجهود كبير جدا من رامي وطبعا لما نغير حاجة في اللحن بيستدعي نغير حاجة في الكلمات تبقى لايقة على الفكرة الأساسية اللي كانت عندي، والموزع أحمد إبراهيم بيغير المزيكا، إليسا وسعد وكلنا كنا عارفين و متأملين من ربنا إن التعب يكون له نتيجة، لإننا عارفين إننا شغالين في حاجة مختلفة، وفنانة في حجم إليسا بجمهورها الكبير ده كله ما شاء الله، هي لوحدها بتوصل لعدد كبير من الناس، وسعد لوحده بيوصل لعدد كبير من الناس، وأنا ليا نجاحات مع الاتنين، أول أغنية يغنيها سعد عدى الكلام، أول أغنية مصري يغنيها في حياته، فحسابات كانت كتيرة أوي إن هي نعمل اللي علينا، إن تكون أغنية حدث مش مجرد أغنية رومانسية نخلصها ونشوف ورانا إيه بعدها، لا أخدت وقتها بشكل كامل، بدأت من 12، ونزلت في شهر 5، وطول الوقت شغالين، وكل ما بنوصل لنقطة معينة، بنحس إن لأ، ممكن يكون فيه أحسن، فنشوف جمل جديدة ونسمع كلنا، يعني هو سواء إليسا أو سعد أو أنا أو رامي أو أحمد إبراهيم، خدت مننا، وأعتقد كل واحد فينا أعتقد إن دي من أكتر الأغاني اللي أخدت وقت معاه، الحمد لله النتيجة كده”.
أغنية “من أول دقيقة” من كلمات أمير طعيمة، وألحان رامي جمال، توزيع أحمد إبراهيم.
يذكر أن الفنان المغربي سعد لمجرد تحدث عن كواليس الدويتو الغنائي “من أول دقيقة” الذي جمعه بالفنانة اللبنانية إليسا.
وقال “لمجرد” في مقابلة مع برنامج “et بالعربي”: “اجتمعنا في باريس، تعرفنا على بعض، وقررنا من أول مرة نعمل ديو، ما أخد الموضوع وقت كتير، لإن الانسجام والكيمستري كبيرة جدًا بيني وبين إليسا، إليسا دخلت قلبي من أول دقيقة”.