بكت الفنانة المصرية شيرين عبد الوهاب، في مداخلة هاتفية على الهواء، مع الإعلامي عمرو أديب ببرنامج الحكاية تعليقا على التسجيل الصوتي لوالد زوجها حسام حبيب، قائلة: “بحاول أمشي جوه الحيط، وقت ما موضوع الاتهامات الغريبة كنت في أمريكا كان عندي مشكلة، والحمد الله، وليا 27 سنة تعبت فيهم جدا بتأذى نفسيا عشان أنا شخص حساس، بس انا كويسة “وانهارت بالبكاء” واكملت وهناك ناس كتير جدا وقفت جنبي”.
فيما علق الفنان حسام حبيب على التسجيل الصوتي لوالده ضده وزوجته الفنانة شيرين عبد الوهاب: “الحمد الله عندي ثقة في مراتي وعلاقتها بيا دي مش بتاعة أي حد، وفي حد عاوز يهد شيرين، هم أشخاص كانوا بيشتغلوا معاها في الوسط وحصل مشاكل وأصبح الناس دي مش موجودة، واكتشفت إن التفاصيل البسيطة اللي بتخرج برة البيت هي دي بقى المصيبة الكبيرة، والموضوع بقى أكبر من حسام وشيرين”، مضيفا: “لو شيرين فاتحة محل فول وتعرضت لأزمة هسيب فني وهنزل أقف معاها في المحل”.
وأضاف حبيب، خلال المداخلة نفسها: “المذيعة دي بتعمل عمل استقصائي ويخترق حياة الراجل، وحضرتك تسمى هذا العمل الاستقصائي ومين الشخص مش هرد، ده مصدري، والقاضي لو سألني هقوله كده.. واتهمت الإعلامية 12 مليون فلورز إنهم ربورتر ودي شبكة تجسس بتخترق شخصيات مهمة، وكانت بتكلم والدي لمدة 6 شهور، ولكن الخطورة إنها بتسأل في خصوصية”.
وتابع: “يوم انتشار التسجيل شيرين صحتني من النوم بتقولي الحق والدك، بقولها ماله توفي ولا إيه، قالت لي لا في تسريب ليه، والبنت اللي كلمت والدك بعتتلي قبل النشر على الفيس والوتس آب وسمعتني جزء أوحش من اللي اتذاع، وقالت إن لسه عندي فيديوهات كتير منزلتهاش”، مضيفا: “محدش يقدر يستفزني، والبنت دي هددتني لو مدفعتش ليها 2 مليون جنيه هتذيع التسريب، قولت ليها تعالي خدي 2 مليون جنيه ونزليه”.
وأوضح حسام حبيب: “آخر ألبوم ليا 2016 والغناء واخده هواية ولا بدخل في عمل شيرين وأنا شغلي لوحده، ووجودي مع شيرين في شغلها شرف كبير، وأنا بحب الست دي من قبل مانتجوز”.
وما زالت أزمة النجمة شيرين عبد الوهاب وزوجها حسام حبيب الأكثر تداولاً على الساحة الفنية وعلى صفحات مواقع التواصل الاجتماعي، بعد تسريب تسجيل صوتي لوالد حسام حبيب، يتحدث فيه عن رغبة ابنه في الزواج من أخرى غير المطربة شيرين، وأوضح في التسجيل الصوتي أن حسام متحكم في كل أموالها وأمور أخرى عديدة.
البداية كانت مع التسجيل الصوتي لوالد حسام حبيب يتحدث مع إحدى الصحف اللبنانية عن علاقة شيرين وحسام حبيب، ثم خرجت شيرين لترد بقوة في تسجيل صوتي على التسريبات.
وقالت في الجزء الأول من التسجيل التي نشرته عبر حسابها على تويتر، قائلة: “عاوزة أطمن كل الناس على صحتي أنا كويسة وحسام زوجي إنسان من أنضف رجالة الدنيا ومتربي وبيحبني أكتر من نفسي وميستهلش منكم كم القساوة دي عشان أنتوا متعرفهوش، هو بنالي شخصيتي ورجعلي ثقتي بنفسي لما كنت مدمرة وحسام بيحبني أنا وبناتي ومن ساعت متجوزني معملش أي حاجة، الست حماتي اللي ربت راجل ست عظيمة وأدعو ليا أنا وحسام بالذرية الصالحة وحسام نقى ونظيف”.
وتابعت في الجزء الثاني من التسجيل: “الفيزا بتاعتي مش معاه وكل الكلام مش مظبوط لأني كلي كده بتاعته زوجي راجل من عيلة وعيلة محترمة أوي ومقبلش أن حد يكلم عليه كده ولا هو ولا والدته، وحسام راجل مفيش زيه بقالنا 4 سنوات متجوزين ولو كان عاوز يستفيد مني كان عامل أغنية سينجل وكل الناس بتختلف وبتتخانق عادي وحسام بيحبني وحاسة معاه بالأمان كفاية أنه طلع من حياتي كل الناس اللي بتستغلني وطلع كل الثعابين والحاجات الفاسدة”.
كما رد الفنان حسام حبيب، على التسجيل الصوتي متوعدا من فعل ذلك بأنه سيدفع الثمن بالقانون، قائلا في الفيديو: “أنا مش عارف أقول إيه المفروض إنها صحفية”، ثم بدأ تسجيل بصوت الصحفية اللبنانية نضال الأحمدية وهي أول من نشر مكالمة والد حسام حبيب قالت فيه “إحنا اخترقنا هذا الرجل بطريقتنا وبقالنا 6 أشهر بنراقب تليفونه، لأن عندنا معلومات وعندنا مستندات بما يحدث واللي أرسلتها مش مذيعة دا سر، ودا عمل استقصائي”.
وقال حسام حبيب في أول فيديو نشره للرد علي ما حدث إن أقرب الناس له متورط في محاولة تشويه العلاقة مع شيرين والناس دي كان لها مصالح إن شيرين تبقى منتهكة لمصالحهم الشخصية، مضيفا: أن الفنانة لها شركة تدير عملها ولا علاقة له بعملها.
ولم تتوقف الأزمة عند ذلك فقط، بل خرج والد الفنان حسام حبيب، وتحدث عن الأزمة التي كان السبب فيها عبر حسابه على إنستغرام، كما وصف نفسه بأنه “عجوز خرف بحكم السن”، معربا عن اعتذاره له ولزوجة ابنه المطربة شيرين عبد الوهاب وطالبها بأن تعيد حسام ابنه لجمهوره والغناء من جديد.
ثم تقبل الفنان حسام حبيب، اعتذار والده له بعد أن كتب والده حسين حبيب، رسالة على حساب جديد على “إنستجرام” ولم تمر ساعات إلا ونشر حسام حبيب ردا على حسابه الشخصى على موقع تبادل الصور والفيديوهات “إنستجرام”، متقبلا فيه اعتذار والده وعلق قائلا: “وأنا ماقبلش أبدا أنك تقول على نفسك عجوز خرف بحكم السن لأني زي ما بغير على بيتي ومراتي برده غصب عني بغير على أبويا”.
وأضاف حسام حبيب: “مهما أذتني ومهما عملت لأنك عارف أني عمر ماهمني رأى حد فيا يهمني بس رضا ربنا عني وأنا هاعمل زي ربنا سبحانه وتعالى أمرني (وَأخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا).