حلت نجمة الجماهير الفنانة المصرية نادية الجندي ضيفة في برنامج “الدوبلكس” مع أبلة فاهيتا، المذاع على قناة ON، وقد ظهرت بمنتهى العفوية وقد تألقت بجمبسوت باللون الذهبي حيث انها معروفة بأناقتها الفائقة وابهرت الجماهير والمشاهدين بجمالها.
وقالت الجندي عن حياتها الخاصة “بلعب رياضة وأصحى بدري وبحافظ على شكلي ومابدخنش.. وده عشان أحافظ على لياقتي.. وبضحي كتير ومحرومة من حاجات كتير زي الحلويات والجاتوه عشان أبقى رشيقة.
وردت الفنانة نادية الجندي على بعض الأسئلة السريعة، وكانت إجاباتها، أنا بمشى حافية على الأرض عادي وده صحي جدا، وبخاف من الصرصار، وممكن اتجوز واحد أصغر مني لو بحبه.
وخلال الحلقة قالت نجمة الجماهير الفنانة المصرية ناديه الجندي، أنا بعشق الرقص والفن والغناء، ولما قدمت رقص في الأفلام بيكون الفيلم حاكم عليا بأني أرقص عشان فيلم استعراضي أو بعمل دور لراقصة، زي مثلا وداد الغازية دي شخصية حقيقية وكان لازم أرقص رقص غوازي، والممثلة الشاملة قليلة جدا.
وكشفت الفنانة نادية الجندي، أنا بحب شغلي جدا، وحتى في فيلمي لما طلعت قدام رشدي أباظة مركزتش في حاجة غير دوري وعشان كده وصلت لأني عارفة طريقي.
وأضافت نادية الجندي ان النجمة الموهوبة اللي تكون عندها قدرات وتقدر تقدم ألوان مختلفة كل مرة ومتكررش نفسها، وأنا حتى في كل أفلامي عملت مشاهد خطر واتعورت كتير وكل فيلم خرجت منه بعاهة.
وتابعت نادية الجندي، يعني مثلا في فيلم “اغتيال”صممت ادخل عربية السجينات وقت ما بيحصل تصادم سيارة بنزين فيها وتتقلب وصممت أكون معاهم، ولما العربية اتقلب تكتفى جه في الصاج واتخلع وكملت الفيلم وعملت الأكشن ونطيت حواجز وانا كتفى مخلوع.
وكشفت نادية الجندي، أكتر حلقة عجبتني في مسلسل “سكر زيادة” كانت اللى فيها أحمد السقا، وأحلى مشهد لما راح مطيرني في الهوا؛ لأنى عملته من غير دوبلير بسبب رشاقتي.
وأضافت نادية الجندي، ” مفيش حد يقدر يعمل قصة حياتي غير وده ثقة بالنفس مش غرور، عن أكثر أغنية مهرجانات تحبها قالت، بحب أغنية “بنت الجيران” وحتى كنت بسمعها وأنا في باريس الأجانب بيغنوها.
وأكدت الفنانة نادية الجندي أنها تتلقى العديد من عروض الارتباط حتى الآن، ولكنها لا تفكر في الزواج مطلقا في الفترة الحالية مشيرة إلى أنها حاليا متزوجة الفن فقط، كما كشفت سر علاقتها المتميزة بزوجها السابق محمد مختار بعد الانفصال، ونفت تماما أن تكون شخصية المرأة الجبارة التي جسدتها عبر أعمالها الفنية معبرة عن شخصيتها في الحقيقة.
أضافت الجندي خلال استضافتها ببرنامج أبلة فاهيتا: أنا مش بفكر في الجواز خالص كل تفكيري في فني وشغلي، عايشة للفن.
وعن علاقتها بمحمد مختار بعد طلاقهم قالت: المفروض أي اتنين ينفصلوا عن بعض يبقي ده الطبيعي بينهم يبقي فيه بينهم رقي وفيه أصل لأن دي عشرة وذكريات جميلة.
وأضافت: بيني وبين مختار أحلي أفلام اتعملت في تاريخ صناعة السينما المصرية.
وتابعت: هو مش بس كان جوزي هو شريك نجاحي رحلة طويلة من الكفاح عيشناها سوا دي حاجة مش بسهولة الواحد ينساها خالص.
وواصلت قائلة: والست اللي تشتم في طليقها بعد انفصالهم تبقى معندهاش أصل عشان في بينهم عشرة وذكريات جميلة مينفعش تتنسي.
أرغمت “كارو” الفنانة نادية الجندي على تناول مصاصة، أثناء استضافتها في برنامج “الدوبلكس” لأبلة فاهيتا المذاع على قناة ON، أثناء توجيه بعض الأسئلة لها، كما طلبت منها غناء أغنية “أنا بعشقك” لميادة الحناوى في ظل وجود المصاصة داخل فمها.
وروت الفنانة نادية الجندى عن أغرب معجب واجهته قائلة: “كان في واحد مجنون بجد بيقف ليا تحت البيت وبيقول عاوز أشوفها ولما الناس تمنعه بيقلع هدومه في الشارع لغاية لما جابوله البوليس”.
يذكر أن آخر أعمال الفنانة نادية الجندى الدرامية مسلسل “سكر زيادة” الذى عرض في شهر رمضان، وشاركها في البطولة كل من: نبيلة عبيد، سميحة أيوب، هالة فاخر، وضمت قائمة ضيوف الشرف: أحمد السقا، روجينا، جومانا مراد، معتصم النهار، لقاء الخميسى، بيومى فؤاد، حمدى المرغنى، مصطفى أبو سريع، مايان السيد، بدرية طلبة، هنادى مهنى، خالد أنور، سليمان عيد، شيماء سيف، مى الغيطى، طارق عبد العزيز، انجى على، عمر زهران، خالد أنور، أميرة هانى.