فاجأت جودي، ابنة النجم أحمد سعد، والدها خلال استضافته في برنامج “معكم منى الشاذلي” المذاع عبر قناة ON، بدخولها الأستوديو وهي تغني أغنية باللغة الإنجليزية.
وقالت جودي إنها أحذت الصوت الجميل من والدها مضيفة: “الصوت الحلو أخدته منه، هو كاني عايزني أعيش حياة مستقرة ومش عايزني أغني وأنا متفهمة طبعا، لكن بالنسبة لي لو عندنا موهبة ممكن نعرضها للناس مرة أو مرتين، ولو ربنا وفقنا يبقى ده طريق ربنا كاتبه لنا”.
أوضحت جودي أنها لا تغضب من انتقادات البعض لوالدها قائلة: “الانتقادات بتبسطني لإني بشوف قد إيه هو بيسمع للناس، ودايما ده بيخليه في تحسن، وبعض النظر عن إنه بابا هو شخص لذيذ جدا”.
وكشف أحمد سعد عن خصوصية علاقته بابنته الأولى جودي قائلا: “أنا في كل حياتي إنسان جريء وواضح جدا، إلا جودي بتكسف منها جدا، هي أكتر حاجة بحبها في الدنيا، وعرفت عن طريق جودي نوع من أنواع الحب مكانش دق على قلبي، وهي أول بنت في حياتي”.
تحدث أحمد سعد خلال اللقاء عن سبب لجوئه لطبيب نفسي، بعد شعوره بضغوط عديدة ومشاكل كانت تحول بينه وبين ظهوره بشخصيته الحقيقية.
وقال أحمد سعد: “أنا بحب الطب النفسي وبحب أروح لدكتور نفسي، وفعلا اكتشفت عيوب في شخصيتي عن طريق دكتور نفسي، كان عندي مشاكل بتخليني مش قادر أشوف نفسي الحقيقية”.
وأضاف أحمد سعد: “أكبر عيب كان في شخصيتي هو إرضاء الآخرين على حساب نفسي، ومبقتش مستمتع بشكل كبير، عندي كل الحاجات الخارجية اللي ممكن تخلي الواحد مستمتع بس مش مستمتع، وكان نفسي أفهم إيه هي المتعة”.
أوضح أحمد سعد أنه مر برحلة تساؤلات حول معنى المتعة قائلا: “بحثت في كل الحاجات، هل المتعة إني يبقى عندي علاقة بالدين أو أصحابي، أو أخرج بشكل كبير وآكل أكلة حلوة، واكتشفت إن كل ده مش المتعة، المتعة إنك تكون ذاتك ونفسك، مش مصطنع عشان ترضي الناس حواليك”.
وأشار أحمد سعد إلى أن تلك التساؤلات شجعته على استشارة طبيب نفسي قائلا: “الأسئلة بدأت تطاردني بشكل كبير، وكان لازم ساعتها أتكلم مع دكتور نفسي. كان في حاجات طول عمري مش متصالح معاها، زي إني وأنا صغير كنت الولد الأصغر في إخواتي، وكنت دايما يبعتوني أجيب لهم الطلبات، وبعمل حاجات كتير مش راضي عنها”.
تحدث أحمد سعد عن الاستنتاجات التي توصل لها بعد استشارة الطبيب النفسي قائلا: “توصلت لإنك لما بتقابل حد بتتطبع بشكل الحد اللي قدامك، إنما شخصيتك الأساسية مش ظاهرة، زائد إني بسبب شغلي كان عندي حب الظهور، وأحب أهزر كتير عشان أبقى جوكر القعدة”.
كما تحدث أحمد سعد عن سلوك يعتقد البعض أنه أحد أوجه الغرور قائلا: “لازم تشوف الحاجات الحلوة والنعم اللي فيك ونقط القوة عندك، مش غرور إنك تقول أنا فعلا إنسان لذيذ وشكلي حلو، وطيب وبحب الخير للناس”.