ظهرت الإعلامية ريهام سعيد دون ماكياج تكشف تفاصيل ما حدث لها على يد طبيب التجميل اللبناني نادر صعب وتشوه وجهها.
وخلال حلقة أمس من برنامج “صبايا”، الذي يعرض عبر قناة “هي”، قالت ريهام سعيد ” كل الناس لما كانت تشوفني كانت تقولي مالك خاسة ليه كدا… كنت بعيدة تماما عن الناس وكنت علشان أنزل محتاجة أحط 13 كيلو ماكياج وفي الاستوديو بنحط حاجة تدعم الوش وتخفي كل علامات الإجهاد ودي بفلوس كتير والقنوات بتأجرها لي”.
وأضافت ريهام سعيد ” ناس كتير أوي كانت عارفة إن حلمي التمثيل ومش الممثلة القديرة لكن كنت موجودة واشتغلت مع عمالقة وفي الدراما ميقدرش يمشي ورايا بفلتر ووقت ما حصلي كدا قولت خلاص ربنا مش عايزك تمثلي، ولو حد عاوزني في عمل هيقوله دي اتشوهت، كان في لحظات وحشة اوي”.
ولم تتمالك ريهام سعيد نفسها من البكاء وقالت “: آخر مرة روحت للدكتور عملي فيلر عشان في حفرة جامدة عندي، بس أنا هدوب الفلير وهتعرض على الطب الشرعي وهيلاقي الحفرة دي”.
واستعرضت ريهام سعيد آثار عملية التجميل التي خضعت لها على يد الطبيب اللبناني وقالت “عندي حفرة كبيرة تحت عيني وعيني بترمش كل 5 ثواني ومش بعرف أتكلم أوي عشان بقي مشدود زيادة عن اللزوم، في ناس كتير بتقول تستاهل عشان بتغير خلقة ربنا”.
وتابعت ريهام سعيد “أنا عملت عملية تجميل عشان بحارب السن بس النتيجة كانت صادمة، أنا مكنتش هقول إني اتشوهت، مش حلو إن جمهوري يعرف أني اتشوهت، كنت بطلة على الهوا لابسة نضارة فاضية عشان تداري الحفر اللي في وشي اللي بانت كأني واخدة بلشة في كل حتة فيه كأني كنت في خناقة”.
واستكملت ريهام سعيد ” شكلي مش أنا، في حتت بروحها بيقولولي اسمك إيه بقالي 10 شهور بلبس نضارات فاضية، ولو ملقتش نضارة في شنطتي بعيط ومنزلش من عربيتي.. هروح أرمي كل النضارات دي خلاص، مهو حمل وانزاح من هنا ورايح هتأقلم على شكلي الجديد والكل هيتأقلم بشكر كل واحد بيدمرني نفسيًا أكتر”.
وأردفت: مكنتش قادرة أطلع هوا النهارده، بس طلعت احترامًا ليكم عشان قولتلكم هطلع لجمهوري عشان محدش يقلق عليا، الناس كانت متخيلة إني هطلع حاجات دا مش مكانه خالص أنا هرفع قضايا في مصر والعراق والإمارات وهتتضمن تشهير وسب وقذف وخروج عن المعايير الطبية”.
واختتمت “طول ما أنا حية أرزق، هافضل باحثة عن حقي وهرجعه أنا ست لوحدي مليش حد خالص بس أنا هاخد حقي، كل ما بيتغلط في بيكون في ميزان حساناتي.. عمليات التجميل مش حاجة وحشة، وشنا رأس مالنا… بالبلدي أكل عيشنا بنعتمد عليه في كل حاجة، مينفعش ممثلة أو مذيعة مش حلوة أو باينة أنها كبيرة في السن، لأن انتم كمان مبترحموش، أنا مش هصلح اللي حصل في إلا لما اتعرض على الطب الشرعي، وأنا عندي ثقة رهيبة في القضاء وربنا”.
من ناحية أخرى، نشرت ريهام سعيد مقطع فيديو صادم أثناء خضوعها للعملية الجراحية على يد طبيب التجميل اللبناني نادر صعب.
وتظهر ريهام سعيد في مقطع الفيديو الذي أرسله لها الطبيب اللبناني وأعادت نشره عبر حسابها على انستجرام، وهي بوجه مفتوح ويتحدث إليها الطبيب نادر صعب أثناء العملية وهو يزيل من وجهها بعض الدهون وعلقت ريهام سعيد على الفيديو “اما الدكتور يشوهك و يبقي مشغول بيطلع الموبايل و بيتكلم عشان يوريك انه كان بيشيل اي بتنجان، لما الدكتور مايراعيش مشاعر المريضه ويبعت لها فيديو ووشها مفتوح .. لما دكتور يخلي واحده تعيش حزينه و مقهوره علي خلقتها الي راحت، هل ده لي اي علاقه بالمعايير الطب او الرحمه يا عالم، ؟ يا رب فوضت امري اليك .. لا الله الا الله سبحانك اني كنت من الظالمين .. حسبي الله لا اللله الا هو عليه توكلت وهو رب العرش العظيم، يا رب يا رب يا رب حقي يرجع”.
من ناحية أخرى، كان طبيب التجميل اللبناني نادر صعب قد خرج عن صمته بعد الجدل الواسع الذي أثارته الإعلامية ريهام سعيد واتهمته بتشويه وجهها بعملية تجميل فاشلة وقال انه سوف يتوجه للقضاء .