رد النجم رامي صبري على اتهام الملحن عمرو مصطفى له بسرقة ألحان أغنية «رقصة» وتقديمها في أغنيته «يمكن خير»، قائلًا: «شخصيًا مش بحب أتكلم على الزملاء بشكل سلبي، فتوجد عِشرة بيني وبين عمرو، لكن بسبب العشرة مش هتكلم بنفس طريقته اللي طبعًا معجبتنيش».
وأضاف «صبري» خلال لقائه ببرنامج «أجمد 7 الساعة 7»، الذي تقدمه جيهان عبدالله، عبر إذاعة نجوم إف إم: «هو قال إني سرقت، وأعتقد رامي صبري ميسرقش، لكن في فرق بين السرقة وتوارد الأفكار، بمعنى أن ممكن أسمع 10 ألحان في منهم جملة شبه الثانية، مثلًا أنا زمان عملت أغنية للفنان عامر منيب (مكنش حب) بعدها بسنة عمرو دياب عمل أغنية من تلحين محمد يحيي، فهي كانت نفس الشكل، وهذا الأمر مش عيب».
وتابع: «الكلام اللي قاله عمرو مصطفى كبير أوي، وده يدينه، هي السرقة دي كلمة عيب، فهو ملحن كبير إزاي يطلع يقول على فنان كلام مش حلو، ومشكلة عمرو مصطفى مش أغاني، ولو إحنا حد فينا سرق من عمرو مصطفى حاجة هيقاضيه قانونيًا، لأن هو كلية حقوق، وأنا كلية معهد موسيقى عربية، وشخصيًا لو أنا مركز معاه وعلى كلامه كنت هاحسبه بالقانون، لكن أنا بكبر دماغي».
واستطرد: «أنا أقوله ربنا يهديك، واشتغل أكتر واعمل حاجات جديدة، زي ملحنين كبار تانيين، مثل عزيز الشافعي، ومدين».