تحدث الفنان عمرو دياب عن هدفه من الغناء، مشيرًا إلى إنه لا يغني من أجل إطراب الجميع، لأنه من الوارد ألا يُعجب صوته البعض.
وقال عمرو دياب في لقاء نادر له مع الإعلامي الراحل مفيد فوزي: أنا مش المفروض إني أحط في دماغي وأنا بغني إني عايز أطرب كل الناس، عشان وارد صوتي وأغانيا ميعجبوش ناس كتير.
وتابع: المطرب له وجهة نظر معينة، في مطرب بيغني عشان الناس تنبسط وتتفاعل معاه وتسقف، مش تقعد ساكت زي لما تسمع مطرب عشان تسمعه هو وتشوف هو إزاي بيقول وبيبسطك، وأنا أحب لما أغني الناس تتفاعل معايا حتى لو بالتسقيف.
واختتم عمرو دياب متحدثًا عن جيله من المطربين وقال: إحنا جيل نقدر نغني أي حاجة ولما باجي أغني مش بغني عشان أبيّن للناس إني مطرب قوي والحاجات دي بالنسبة لي مش مهمة، لأن إحنا عندنا علي الحجار خلاص، لكن أنا بعمل الحاجة اللي أنا عايزها زي أغنية ميال اللي فيها نوع من الحنية والغنا الهادي لكن مفيهاش صريخ أو عويل.
على جانب آخر، تحدث عمرو دياب في لقاء نادر آخر له مع الإعلامي عماد الدين أديب، عن وجهة نظره في فكرة أن الغناء حرام قائلا: أنا مش بعرف أعمل حاجة غير إني أغني وضميري راضي كويس جدًا تجاه الغنا، ومبعملش حاجات غلط كتير إذا قدرت.
وتابع عمرو دياب: وإذا كان الغنا حرام يبقى يمنعوه، ولكن إمتاع الناس ده قيمة عالية جدًا لما بحس في عيون الناس إنهم مبسوطين، دي نعمة من عند ربنا، وأنا نشوتي في موهبتي.