مصطفى قمر لـ انغام :”اللي كسبته من الشغل صرفته عليه وتأثرت بمحمد منير”


حل الفنان مصطفى قمر ضيفًا على الفنانة أنغام ببرنامجها المذاع عبر قناة دي إم سي، وتحدث خلال الحلقة عن ذكريات الطفولة وفترة الجامعة، وبداياته في مجال الغناء، بجانب تقديمه العديد من الأغاني المؤثرة في مشواره الفني.

ونكشف بالسطور التالية ابرز تصريحاته:

-كنت زمان باخد في الفرح 1500 جنيه وحوشت 40 ألف جنيه في سنة وصرفتهم كلهم على تصوير أغنية بابا نويل، وإيهاب توفيق لما اتفرج كان كأنه عايز يقولي يا عبيط صرفت فلوسك كلها ليه.

-الفن حب مش هواية، عشان نكسب منها فلوس والنجاح أحلى بكتير.. أنا زمان كان كل فلوسي اللي بكسبها من الشغل بصرفها على الشغل، والحمد لله شوفت نتيجة ده.

-كررت مع ابني إياد مقالب والدي معايا، وقولتله وإحنا بنلف إسكندرية القصر ده بتاع جدك الملك فاروق، ولما راح المدرسة قال لأصحابه جدي الملك فاروق.

-علاقتي بالموسيقى بدأت في رابعة ابتدائي بالعزف، لما سألت مدرسة الموسيقى مين يحب يعزف على الماندولين، قولتلها أنا.. وبعد كدا اتعلمت الجيتار.

-بدأت علاقتي بالغنا لما كنت في رحلة عائلية للعريش، وبدأت أغني معاهم، وفجأة سكتوا كلهم عشان يسمعوا صوتي وساعتها مبطلتش غنا طول الرحلة.

-كنت بحلم دايما وأنا صغير بالنجومية، وإني زي عبد الحليم حافظ وكنت بحب الليل عشان أبدأ أتخيل وأحلم.

-بدأت خطواتي في المشوار الفني من كلية التجارة، وروحت أول يوم بالجيتار وده كان شيء غريب على الجامعة كلها.

-بقى ليا جمهور داخل الجامعة، وده أداني ثقة كبيرة في نفسي.

-أول حفلة ليا كانت في الجامعة وكان في مطرب هناك اسمه جمال جوجو وقالولي هتعمل حفلة أنت وهو، فحسيت أن الحفلة دي مهمة جدا.

-المزيكا رأي وأنا كده بنقل للناس رأيي في الحياة عمومًا.

-وقت الجامعة كنت بحب محمد منير وتأثرت به، وأعجبت بشكل المزيكا دي، وساعتها كنت بحب الأغاني الغربي أكثر من الشرقي.