حل السوبر ستار الفنان اللبناني راغب علامة ضيفا على محطة راديو إنرجي 92.1، في حلقة خاصة مع سارة المنذر ومنة عامر، وتمت إذاعة أعماله على مدار الشهر بصورة متتابعة.
وأعلن راغب علامة تفاصيل أغنيته الجديدة “ملك الرومانسية”، التي من المقرر طرحه قريبا بعد إجراء بعد التعديلات عليها، وهي من تأليف ناصر الجيل، وكذلك العديد من الكواليس عن حياته ورأيه في بعض الأصوات الموجودة في الساحة الغنائية وهو ما سنرصده في السطور التالي:
– رفضت تقديم تتر مسلسلين في رمضان وبختار على حسب الأغنية والكلمات مش مهم مين نجوم العمل.
– لا أقدر على متابعة المسلسلات بشكل دوري بسبب انشغالي بأغنياتي وحفلاتي.
– كليب أغنيتي “أنا ممكن أزعلك” كانت فكرة المخرج شريف صبري، ووافق عليها على الفور، وهي قائمة على التحول من القتل إلى الحب على عكس ما حدث في “Squid Game”.
– تقديري لزوجتي لا يكون أمام الناس ومش بحاول أعمل بروباجاندا وأنا بوفرلها كل طلباتها وبحققلها أحلامها وهي مكنتش تحلم بالحاجات اللي عملتها لكن أهم حاجة القناعة وراحة البال وأي حاجة تليق بيها وبعائلتنا بنفذها.
– في بيتي أنا روتيني جدا وكل حاجة بعملها من الصبح لليل هي هي كل يوم ولا أتبع كل شيء على الموضة خاصة في ملابسي وهذا يسبب خلاف دائم لي مع أبنائي.
– بعض الأصوات الموجودة على الساحة الغنائية حاليا بخجل منها فهم لاشكل ولا صوت لكنهم قدروا على فرض نفسهم وصناعة شيء من اللاشيء.
– الأغاني التي أحبتها خلال الفترة الماضية “الغزالة رايقة” و”سكر محلي” ومعرفش ويجز موصلش عندي لسه.
– في فترة من الفترات من كتر نجاح أغنياتي المصرية بعض النجوم في لبنان ومنهم ملحم بركات عملوا عليا حملة لسحب الجنسية اللبنانية مني وهو مسكين الله يرحمه كان نفسه ينجح في مصر ومانجحش.
– رديت على هجوم ملحم بركات عليا بسبب غنائي كتير باللهجة المصرية بإني قولت لو بتعتبر غنائي باللهجة المصرية خيانة فأنا أتشرف بهذه الخيانة واسكت بقي.
– قرارات نقابة المهن الموسيقية بمنع عدد من مؤيدي المهرجانات أنا شايف أنها بتعمل شغلها لكن في الوقت اللي أحنا فيه ده القرارات دي مش هيبقى ليها نتيجة خاصة إننا في عالم الديجتال والسوشيال ميديا.
– أحب سعد لمجرد كفنان لكن حياته الخاصة أمر آخر والقضية اللي عليه ممكن يكون مذنب أو بريء.
– لو هعمل سوبر ستار على مزاجي هختار شخصية ماجدة الرومي وشكل هيفاء وهبي بس مش دلوقتي من 10 سنين وذكاء عمرو دياب.
– وأنا مكتئب بحب أسمع فيروز.. وفي الصباح أسمع ماجدة الرومي.. وأنا سهران بحب أسمع أم كلثوم.. وأنا بلعب رياضة مش بحب أسمع مزيكا.