أعلن المنتج طارق الجنايني عن إصابة والدته بفيروس كورونا المستجد وذلك عبر صفحته على موقع التواصل الاجتماعي “فيسبوك”.
وكتب طارق الجنانيني قائلا: “الكورونا مش عيب ولا حرام.. أنا تقريبًا عمري ما كتبت في أي مرة عن شخص توفى أو تعب من عيلتي لأني بشوف أن دي حاجات شخصية و محبش أشارك الناس بيها..إنما المرة دي حاسس إني محتاج أكتب التجربة دي لأنها ممكن تفيد غيري”.
وتابع:” أمي بقالها تقريبًا ٣ شهور مش بتنزل من البيت خالص وعاملها كل الأحتياطات اللي تمنع إختلاطها بأي حد غير مقيم معاها في البيت.. المهم من ١٢ يوم عزمت ٢ صديقاتها على الفطار، علمًا بأن صديقاتها برضه كانوا إلى حد كبير معزولين عن الناس، بعد الفطار بيومين أبتدت أعراض كورونا تظهر على الصديقة الأولى، بعدها بيومين على الصديقة الثانية بأعراض أخف شوية”.
وأضاف: “طبيعي أترعبنا، مع أن الأعراض عند والدتي لم تتعدى الحلق وكحة و دوخة خفيفة.. عملنا لأمي التحليل الأول، وطلعت النتيجة إيجابية لڤيروس الكورونا اللعين.. للعلم والدتي في منتصف السبعينات و من ٣ سنين عدينا بسرطان و ما تلاه من علاج كيماوي و خلافه، يعني المناعة عندها مش في أحسن حالة.. بعد قراية كتير جدًا و تواصل مع ٣ أطباء أجلاء، قررت عدم نقلها لمستشفى (في حالات معينة هي اللي فعلًا محتاجة سراير المستشفيات)، بالأضافة إلى عدم بداية أي دواء من اللي اتقال و الأعتماد على الأتي فقط:
قرصين أسبرين ١٠٠ بعد الغداء
قرص ڤيتامين C ١٠٠٠مج مرتين في اليوم
قرص ڤيتامين D مرة في اليوم
قرص zinc ٥٠ مج
قرص ڤيتامين E
قرص omega 3
و في حالة أي أضطرابات في المعدة، قرص nexium قبل الأفطار
و عند الحاجة، قرص بانادول أكسترا كل ٦ ساعات
سوائل دافية ( ينسون . قرفه . جنزبيل )
غرغره مياه وملح واستنشاق مرتين فى اليوم.
يالأضافة لصدقات كتير، لأني مقتنع تمامًا أن الصدقات ترد البلاء.
وأضاف:”الحمدلله الموضوع ماشي تمام، و الأمور فضلت مستقرة لغاية ما عملنا تحليل تاني بعد ١١ يوم من يوم العدوى و الحمدلله النتيجة طلعت سلبية، بس لأن مش دايمًا النتايج بتكون مظبوطة و هي لسة عندها أعراض بسيطة، فا إن شاء الله هنعمل تحليل أخير بعد أكتمال ١٤ يوم من العدوى و إن شاء الله النتيجة هتكون سلبية.
وأختتم تدوينته قائلا:”أتمنى التجربة دي تفيد أي حد هيقراها والناس تاخد حذرها أكتر لأن توقعي اللي أتمنى أكون غلط فيه، أن البلد دي هتعدي بأصعب أسبوعين عدو عليها من زمان أوي، فأتمنى أن على الأقل الناس تكون واضحة و صريحة مع بعض و محدش يخاف ولا يخبي لأن الكورونا مش عيب ولا حرام.