حذر المخرج رامي إمام، من صفحة مزيفة على موقع التواصل الاجتماعي “فيس بوك”، تنتحل شخصيته، فيما يبتز القائمون عليها المتابعين ويطلبون منهم أموال ومطالب غير أخلاقية مقابل توفير فرص تمثيل وهمية، حيث يدعى الشخص الذي يدير الصفحة أنه رامي إمام، وأنه يستعد لإخراج فيلم ويحتاج لوجوه جديدة.
وظهر رامي إمام، في مقطع فيديو للتحذير من هذه الصفحة الزائقة، وقال “مساء الفل على حضراتكم يارب كلكم تكونو بألف خير وصحة وسعادة.. الـ”fake account page” اللي هي باسمي يا جماعة على “فيس بوك”.. أنا بشكر كل الناس اللي بقالهم فترة بيبعتولي رسائل بيستفسروا فيها وبيسألوني إذا كانت دى صفحتي ولا لاء”، وأضاف “وبشكر كل الناس من حضراتكم اللي قالولي احنا أكيد عارفين إنها مش صفحتك لأن احنا عارفينك كويس وشكرًا جزيلًا يا جماعة على الثقة الغالية دي”.
وأضاف رامي إمام “بالفعل هي مش صفحتي خالص دي صفحة “fake” بس المرة دي الموضوع مختلف تمامًا، لأن الشخص اللي عامل الصفحة دي تعدى كل حدود الأخلاق والأدب في أي وقت وأي زمان وأي مكان.. الشخص دا بيقول إن هو أو أنا يعني بعمل فيلم جديد فطالب وجوه جديدة وأكيد في جزء كبير جدًا من الناس اللي بيحبوا يمثلوا هيخشوا على الصفحة دي علشان خاطر يتفاعلوا مع هذا الشخص وبيطلب منهم فلوس قصاد إن هما يمثلوا إلى جانب إنه بيطلب حاجات لا يمكن ولا تليق أبدًا إن هي تتطلب من أي حد بالذات السيدات المحترمات اللي بيخشوا”.
وتابع “أنا بقول يا جماعة الصفحة دي مش بتاعتي نهائيًا خالص، وبقول للشخص اللي عامل الصفحة دي وأي شخص تاني هيعمل أي صفحة مستقبلية أنا بإذن الله هقفل الصفحة دي وغير كده أنا هبدأ أخد اجراءات قانونية الفترة اللي جاية علشان الموضوع يبقى أكبر بكتير من مجرد قفلت صفحة ويبقى في مسائلة قانونية لأي شخص يحاول إن هو يعمل صفحة غير بتاعتي”.
وأوضح “صفحاتي على الفيس بوك يا جماعة هما صفحتين بالظبط.. الصفحة الشخصية بتاعتي والصفحة التاني عليها تيكت زرقة فواضح إنها الصفحة الرسمية بتاعتى.. مش بس كده أنا حابب أشكر كل متابعي الصفحات المحترمين جدًا اللي موجودين عندي على إنستغرام كلكم محترمين وهكذا يجب أن تكون صفحات الفانز المحترمة شكرًا جزيلًا لأدبكم واحترامكم واحترامكم لأداب نشر الصور وأنا بقول لحضراتكم انتوا على راسي من فوق شكرًا جزيلًا ليكم وأنا بحترمكم جدًا.. مسائكم زي الفل”.