علق الفنان رامي صبري، على تشبيهه بـ الهضبة عمرو دياب، موضحا أنه ينتمي لـ جيل آخر غير جيل عمرو دياب.
وتحدث رامي صبري، خلال تصريحات إذاعية: «أول ما اشتغلت قعدت فترة أسمع ده بيقلد عمرودياب ده عاوز مش عارف إيه، وأنا كنت أسمع من بعيد وأضايق من التشبيه هما بيعملوا كده ليه، هو أنا فعلًا بقلده؟ هو أنا شبهه؟ يمكن أنا متأثر بيه وأنا مش عارف، وعمرو دياب جيل تاني مش جيلي يعنى حتى لو في شبه مش أزمة».
وتابع رامي صبري: «فضلت طول أول خمس سنوات أخلي بالي أوي لو أنا شبهه في حركة الأيد وأركز في كل التفاصيل، وبقيت كده لحد ما ابتديت واحدة واحدة أحس إن الناس ابتديت تهدى في الموضوع ده لأن الناس مكنتش عارفاني في الأول ومتعرفش أنا بعمل إيه وأنا حقيقي ولا شوية وهمشي».
وأضاف رامي صبري: «أنا كنت بحاول أحافظ على شكل الأغنية اللي بقدمها حتى المزيكا أقول بلاش دي شبيهة لعمرو بقيت كده لدرجة إني خلاص داخل على 9 ألبوم ولسه مركز، والحمدلله أنا بغني من 18 سنة»
وكانت آخر أعمال الفنان رامي صبري، هي أغنية «Attraction» بالعربي، بالتعاون مع المطربة الأوكرانية اتولوبوف، والأغنية من كلمات Andrii Belayev والشاعر تامر حسين، هندسة صوتية نادر سليمان، كمانجا محمد مدحت، وحازت الأغنية على إعجاب الجماهير على مستوى العالم.