فيديو- حنان ترك تتوعد من ينتحل شصيتها.. وتقول:” انا لا بحرّم ولا بحلل”


وجهت الفنانة المعتزلة حنان ترك، رسالة إلى الأشخاص الذين يتحدثون باسمها في أمور سياسية ودينية عبر مواثع التواصل الاجتماعي المختلفة.

قالت “ترك” في لايف عبر حسابها على موقع التواصل الاجتماعي “فيس بوك“: “في صفحات كتيرة جدا منتحلة اسمي وبتتكلم باسم الدين والسياسة وحاجات غريبة جدا أنا ماليش علاقة بيها ولا عمري هتطرق للمواضيع دي وأنزل بوستات بالشكل دا، أولا لأني سياسيا جهلة جدا ومعنديش وعي سياسيي يقولكم أعملوا كذا، معنديش الثقافة السياسية اللي أنظر بيها”.

تابعت: “أنا لما درست علوم شرعية درست على سبيل النجاة وليس على سبيل الدعوة، لأن الدعوة دي كبيرة جدا.. أنك تدعو لله سبحانه وتعالى دا موضوع كبير جدا محتاج علم وفقه، ومن كتر ما هي مسؤولية كبيرة محدش يقدر يعملها، والتأويل على الله دا موضوع كبير جدا، أنا فين والموضوع دا فين؟! فأي حاجة تنزل على لساني حنان قالت فتوى، لأ ماليش علاقة بيا خالص لا بحلل ولا بحرم والكلام دا مالوش علاقة بيا، وأنا أصغر بكتير من إني أفتي في دين ربنا سبحانه وتعالى، ودا له ناسه.. ودي نصيحة للناس لما تبقى عايز فتوى معينة خدها من أهل العلم من المسؤولين عن الفتوى والمصرح ليهم بالفتوى”.

في سياق آخر، قالت: “أنا صعب عليا نفسي قوي لما صحابي وحبايبي اللي يعرفوني كويس زعلوا مني، من حاجات أنا ماليش علاقة بيها وعمري ما قولتها.. يعني اتاخدت قوي من جوايا، وقولت معقولة هما نسيوني قوي للدرجة دي! يعني ممكن يفتكروا إني ممكن أقول الكلام دا! فبصراحة خدت على خاطري منهم قوي، بس الحمد لله أن ربنا أنصفني وعرفت أوثق الصفحة بتاعتي والصفحات التانية اللي كانت بالملايين معظمها تراجع، بعد ما كانوا بيتكلموا باسمي في كل البوستات ودي حاجة أنا مش هسكت عليها، ولو أي حد بيتكلم باسمي يشيل البوست لأني هبتدي أخد إجراءات ومش حابة يكون دا موجود”.

أضافت: “قررت إني أبقى موجودة بدل الإشاعات، وعملت قناة على اليوتيوب لسه مش عليها حاجة، بس هتواصل معاكم من خلالها لو حابين تسألوا عليا وتعرفوا عني”.

كما وجهت الشكر لمن ساندها في أزمتها الصحية الأخيرة، قائلة: “عايزة أشكر أسرتي اللي وقفت جنبي في مرضي الأخير، وكل أصدقائي اللي سألوا عليا، ود. أشرف زكي اللي كلمني وأطمن عليا وقالي لازم أسجل رسالة بصوتي عشان أطمن أصدقائي وعملت كده بالفعل، وفي ناس كتير تواصلت معايا بشكرهم قوي، وبشكر الجمهور اللي دعواته بفضل الله بقيت أحسن بكتير وكويسة جدا”.

وكانت قد خرجت الممثلة المعتزلة ​حنان ترك​ عن صمتها وأعلنت في منشور لها في صفحتها بموقع على وسائل التواصل الاجتماعي أن هناك العديد من الصفحات التي اغتمنت فرصة ابتعادها عن السوشيال ميديا وصارت تنتحل صفتها وتطرح منشورات باسمها.

وكتبت حنان ترك قائلة: “في صفحات كتير بتتكلم باسمي وأنا غير مسؤولة عنها، حبيت أعملكو فيديو مباشر من صفحتي الرسمية على فيسبوك للتوضيح”.

مشيرة إلى أنها ستطل مباشرة على متابعيها في بث مباشر اليوم عبر صفحتها الرسمية على فيسبوك”.

يذكر أن حنان ترك أعلنت اعتزالها التمثيل بعد مشوار طويل من الأعمال الفنية بسبب التزامها الديني.