علق عدد من نجوم الفن على فوز ريال مدريد ببطولة دوري أبطال أوروبا على حساب ليفربول بهدف نظيف.
ويرصد موقع FilFan.com تعليقات نجوم الفن عبر مواقع التواصل الاجتماعي المختلفة على تلك المباراة التي أقيمت بملعب استاد دو فرانس بالعاصمة الفرنسية باريس.
نبيل الحلفاوي كتب: “لعشاق الريال.. آسف مقدما.. لم يقدم ما يليق باللقب.. ليڤربول هرسه. تم اختزال الفريق في حارسه لولاه لحسمت من الشوط الأول”.
نجم مسرح مصر محمد أنور نشر صورة لمحمد صلاح بعد المباراة وعلق قائلا: “بدل ماتفرحوا بفوز ريال مدريد وتفرحوا بخسارة محمد صلاح افرحوا ان فيه واحد مصري على سقف طموحنا وخلانا زعلانين أنه خسر نهائي دوري أبطال أوروبا في الوقت اللي لما كان واحد مصري بيحترف في الدوري السلوفاكي كنا بنفرح واحد مصري بقى أهم وأفضل لاعب في الدوري الإنجليزي في اخر ٥ سنين ومن أفضل ٥ لاعبين في كوكب الأرض والناس في العالم كله بتغنيله وبتهتف باسمه واسم مصر”.
وتابع: “واحد مصري خلي شباب كتير اوي يتمسك بالأمل ويشوف أن مفيش حاجة مستحيلة أحنا زعلنا النهاردة على صلاح هو زعلنا على نفسنا بالظبط لأننا كنا عاوزين سقف طموحه وطموحنا يعلى أكتر من كده ويبقي ملوش حدود وازعلو على كل سنه بتضيع من عمر صلاح في الملاعب من غير ما يحقق كل حاجه لأننا من بعده ماحدش هيعيشنا اللحظات دي تاني وهنرجع نتفرج على الناس دي في البلايستيشن بس”.
https://www.facebook.com/permalink.php?story_fbid=1418054408658439&id=100013616800983
وعلق محمد هنيدي على خسارة ليفربول قائلا: “عارف لما بتبقى بتلعب بلاعب في البلاي ستشين وفجأة تلاقيك بتنافسه أو اللاعب بعد ما اعتزل بيحلل اداءك في التلفزيون وبيوصفك بالأفضل في منطقتك في العالم عشان كدة بقى عايز أقول حاجة.. بقالي فترة بشوف “بعض” الشباب اللي بيحاول يسخر أو يقلل من صلاح.. يمكن يكونوا مابيحبوش صلاح أو بيشجعوا فرق منافسة”.
وتابع: “من حقك ماتحبش صلاح وحقك تحب فريق منافس وتشجعه بس الفكرة ليه تقلل أو تكره واحد قدر يعمل اللي ملايين كانوا بيشوفوه مستحيل؟ .. صلاح اللي كان بيسافر بالقطار كل يوم وينام في النادي على الأرض وبدون واسطة قدر يصنع نفسه من الصفر لغاية لما وصل أنه بقى ينافس على الأفضل في العالم صلاح زينا وشبهنا ماتولدش في بقه معلقة دهب قدر يكون مثال لأي واحد بيتعب وشايف أنه حلمه وهدفه مستحيل يتحقق”.
واستطرد: “صلاح مثال لأي شخص مجتهد وبيمر بظروف صعبة وحياة صعبة مثال انك تقدر مش بس تكون الأفضل في بلدك تكون الأفضل في العالم.. الفكرة مش في الشخص.. الفكرة في الفكرة نفسها.. أن يكون عندنا شخص وأشخاص طبعا في مجالات كتير تانية زيه.. قدروا يحققوا اللي أنت وأحنا كنا شايفينه مستحيل.. فالحب والتقدير لصلاح.. مش حب لشخص ..حب لفكرة ونجاح وهاردلك لصلاح”.
ودعم أحمد رفعت نجم ليفربول محمد صلاح قائلا: “سنعود قلبي معاك وانت خساره في كل الرعاع الشمتانين فيك ومش مقدرين قيمتك اللي بدونك كان اخرهم يتفرجوا علي ملخصات ميدو في سلتافيجو وتريكة في بني ياس”.
وتابع: “سنعود يا فخر مصر والعرب وإن لم نعد فيكفيك المجد الذي صنعته بنفسك لبلدك ولنفسك وانت خارج من افسد منظومة رياضية بحثت عن إفشالك بكل الطرق هارد لك”.
وبهذا الفوز حقق ريال مدريد رقم قياسي جديد بعدما حصل على اللقب الـ 14 في تاريخه مبتعداً عن ميلان صاحب الـ 7 بطولات.