تجسد الممثلة عفاف رشاد ضمن أحداث حدوتة “خيال حلمي” من مسلسل “القرار” شخصية والدة بطل العمل الفنان إدوارد الذي يتعرض لمشاكل عديدة مع زوجته، ويشارك في بطولته كل من نانسي صلاح ومحمد عبدالجواد ومحمد مهران ومن إخراج تامر حمزة، وتم تصوير عدة مشاهد من العمل داخل ستوديو المغربى بشبرامنت ومن المقرر أن ينتقل التصوير إلى العين السخنة خلال الأيام المقبلة.
وقالت الفنانة مؤخرًا عفاف رشاد في لقاء خاص لـ”اليوم السابع”: الضجة الكبيرة اللي حصلت دي ماكنش ليها أي لزمة أنا طلعت تريند وأنا لا أهتم بهذه الأمور ولا بعمل لنفسى أي شهرة ولا الكلام ده، وزى مأنا سعيدة طبعاً بتعليقات الناس اللى اتكلموا عنى، فأنا كمان زعلانة من الناس اللى كانت بتتنمر بى، وأنا معملتش أي حاجة غير إنى غيرت صورة البروفيل على الفيس بوك زي أي حد .
وأضافت الفنانة عفاف خلال لقائها مع كاميرا اليوم السابع: تشبيهي بالفنانات العالميات ده مايهمنيش وأنا ماطلبتوش ومحدش ليه دعوة بصورتي الشخصية، وشكراً لكل واحد قال عنى كلمة كويسة وأنا خلال مسيرتي الفنية معملتش حاجة تخلينى أخجل منها، وأنا زي ما أنا ممثلة فأنا إنسانة وليا بيت وابن اللي كنت بحلم يبقى دكتور وفعلاً قدرت أخليه دكتور.
وخلعت رشاد قناعها الواقى وهى غاضبة وأكملت: ناس بتقول عندي 64 سنة وعاملة كده إزاي أنا مش عاملة فيلر ولا الكلام ده، أنا قدمكم أهو مع إنى مكنتش عايزة أظهر لأني مش فرجة وأنا مش مبسوطة لأن فيه حاجات أهم وبجد أنا زعلانة.
وعن أزمة الحجاب قالت عفاف رشاد: أنا مش عارفة الناس جابت التصريحات دي منين، كل اللي قولته إنى كنت لما بلبس حاجة على رأسى فبيحصلى صداع نصفي لأني مصابة بيه من وأنا طفلة، لكن ماقولتش إن الناس ماتلبسش الحجاب لأنه بيجيب الصداع ده كلام غلط طبعاً.
وأكدت: “الحجاب ده بيني وبين ربنا ومحدش له دعوة بيا ليكم بس دخل في شغلي غير كده يبقى عيب ومايصحش“.