شنت الفنانة الاستعراضية سما المصري، هجوما عنيف على الفنانة شيرين عبد الوهاب، بعد ردها على إحدى المعجبات في حفلها الأخير بلبنان عندما طلبت غناء “ما شربتش من نيلها” لترد شرين: “هيجيلك بلهارسيا”.
وكتبت سما عبر حسابها على انستغرام: “إن كنتوا نسيتوا اللي جرى، الله يرحم أيام الكحرتة، الأخت الفنانة شيرين في واحدة في حفلة طلبت منها أغنية (ماشربتش من نيلها) فردت عليها وقالت لها (هيجيلك بلهارسيا)، اشربي (مياه …. أحسن).
ونشرت سما صورة لشيرين في بداية مشوارها الفني، قائلة: “دي صورة الأخت الفنانة شيرين أيام ما كان عندها بلهارسيا، أيام ماكانت بتشرب من مياه النيل قبل ماتتعلم انجليزي وتعرف تقول اسم الميّة المعدنيه بالإنجليزي، اللهم يرحم كنتي زمان، وكنتي فاكرة الكريسماس آيس كريم انتي اللي قلتيلي كده فاكره؟”.
وتابعت سما: “بصي أنا مش هقولك مصر اللي عملتك ولا مصر اللي نضفتك زي ناس كتير ماهتقولك كده لا سمح الله، لا أنا هقولك ميّة البلهارسيا دي بتاعت مصر، عارفه يعني إيه مصر ولا مش عارفه؟، هي المياه دي اللي خلتك شيرين والعيب مش عليكي العيب على اللي لسه بيقول عليكي فنانة ونجمة وانتي طايحة في خلق الله، مرة عمرو دياب ومرة شريف مدكور وصوتي لعساف ضد أحمد جمال ابن بلدك”.
وأضافت سما: “بصي يابنتي أنا عارفة إنك بتحبي لبنان عشان ماعندهمش بلهارسيا زينا، ريحينا منك ومن لسانك على الناس وعلى مصر اللي بقى يقل أدبه حتى على مصر اللي ربتك وروحي عيشي في لبنان والله هنكسر وراكي زير، بلد البلهارسيا ماتنفعش تعيش فيها واحدة زيك بتاعت مياه معدنيه وفساتين براندات وبارفانات وحاجات، سيبي دا للغلابة، فاكره مطعم …. اللي في المنيل اللي نصر محروس اخدك منه وانتي بتغني هناك بالشبشب أبو ورده؟، لسه موجود المطعم ويشهد انك كنتي مش لاقيه حتى تشربي ميّة البلهارسيا لا انتي عارفه كنتي بتشربي مياه إيه”.
وتابعت: “أيوه هي المياه الصفرا دي هي دي للي كنتي بتشربيها اللي كلها أملاح دي، دي فعلا اللي تليق ليكي، ياتروحي لبنان ياترجعي تشربي المياه الصفراء المملحه يا تعتذري لمصر، مصر اللي عملت منك فنانة وتعتذري للمصريين كلهم، ملعون أبو الشهره ياشيخة اللي نستك أصلك وأهلك وبلدك، دا انتي مفيش دم ولا إحساس ولا أي حاجة”.
واستطردت سما: “مصر بتمسي عليكي بصورتك القديمة دي وبتقولك اوعي تنسي نفسك لانك لو نسيتي المصريين مابينسوش ، سبحان العاطي الوهاب بعد الشبشب والقبقاب يابنت عبد الوهاب، لو مش عاجبك البلهارسيا عشان انتي ماتستحقيش تقعدي في مصر، طبعا الحبيبة هيقولوا لي بصي للبسك الأول، أيوه بلبس كل حاجه وحشة في نظركم بس لا أهين بلدي واللي يهين بلدى أقطع له لسانه حتى لو آه ياليل، ليل أسود ياشيخة عليكي لما تتريقي على بلدك، اخس على الفلوس اللي بتغير النفوس”.
