كشفت الممثلة المصرية ليلى علوي خلال لقائها في برنامج “كلمة أخيرة” الذي تقدّمه الإعلامية لميس الحديدي على قناة ON، أن صعوبات التمثيل بالنسبة إليها تكمن في أداء مشاهدها بالطريقة التي يريدها المخرج.
وقالت: “أنا بحب الشغل، والصعب في إنك تصوري الحاجة زي ما المخرج عايز. أفتكر مرة إيدي اتفتحت وأنا بكسر زجاج في فيلم “إنذار بالطاعة”، لما بشوف جاري أستاذ محمود حميدة بينقلوه بعربية إسعاف وأنا مش قادرة أروحله. كان ممكن يحصل حاجة وحشة لا سمح الله، وخدوني في عربية هشام سري وعاطف الطيب الله يرحمه على المستشفى عشان يخيطوهالي.”
وأضافت: “وفي فيلم “خرج ولم يعد” وقعت في الترعة، وكان تصوير نهار، وقعدوا ينشفوني بكل سشوارات الدنيا عشان أروح أكمل الشوت. أي صعوبات تانية أنا مبفتكرهاش.”
وعرضت الحديدي مجموعة من صور ليلى علوي مع الفنانين: أحمد زكي، نور الشريف، فاروق الفيشاوي، محمود عبد العزيز، ومحمود حميدة.
وفي تعليقها على صورة نور الشريف، قالت ليلى علوي: “أستاذي وأول ما ابتديت كان معاه في “بكالوريوس فى حكم الشعوب”، ورشّحني في أفلام كتيرة بعد كده.
وكان دايماً متبعني في شغلي في المرحلة الأولى عشان يقوللي نصايحه وملحوظاته في الأداء، وكان دايماً يقوللي عينيك بتعبر كويس قوي.. وقالي متتخنيش ومتقصيش شعرك.”
ورداً على سؤال “بتعملي إيه عشان تخسّي؟” قالت علوي: “بالليل باكل زبادي باللمون، ده اكتشاف. يا جماعة اللي عايز يخس ميتعشاش بالليل، ياكل زبادي باللمون وادعولي بعدها.”.
ويُعرض للنجمة ليلى علوي في دور السينما فيلمها “ماما حامل” والذي حقق إيرادات قوية.
وقالت :”الفيلم لذيذ أوي عشان كده حبيته، ومن أول ماسمعت اسمه في التليفون ضحكت ولما قرأت فرحت وانبسطت ومكنتش مصدقة أنه حلو كده، ولما عرفت التيم وصلت لمرحلة الانشكاح”.
حول أدائها مع الفنان بيومي فؤاد، أكدت ليلى علوي: “أن بيومي فؤاد رجل طيوب جدًا وذكي أوي وعنده قدرة على التجميع والاستيعاب ويكون جاهزا على طول بالإضافة لكوكبة الشباب نانسي صلاح وحمدي وسلام كلهم لذاذ، وكنت بفطس على روحي من الضحك كل ما أشوفهم، صحيح كنا بنقعد لساعات طويلة ما بين 16 ساعة في العمل لكن بمجرد ما أشوفهم بيتكلموا مع بعض بفطس من الضحك”.