بعد ثورة “الإخوان” وسيل الانتقادات حلا شيحا تردّ بقوة


خرجت الفنانة حلا شيحة، عن صمتها لتنهى الجدل الذى أثاره خلعها الحجاب وإعلانها العودة إلى الفن مرة أخرى، مؤكدة أنه أمر شخصي، وأن القرار نابع من داخلها دون تأثير من أحد.

وقالت خلال مكالمة هاتفية، مساء أمس، مع الإعلامي وائل الإبراشي، في برنامج “العاشرة مساءً “على قناة دريم: “القرار كان نابع مني وأنا متأثرتش بأي حاجة وحسيت إني حابة أرجع للفن تاني، ورد الفعل كان قوي بس كنت متوقعاه.. والحاجة اللي ضايقتني إن الهجوم أحيانا يبقى من غير منطق.. كل واحد ممكن يعبر عن رأيه بس قولوا رأيكوا من غير تجريح أو تصنيف”.

وتابعت: “ربنا أكبر من كل اللي إحنا بنفكر فيه.. أنا سعيدة إني عايزة أرجع للفن لأن الفن رسالة عظيمة وممكن من خلاله أقدم أعمال مختلفة ممكن تبقى سبب في أنها تغير الناس لحاجة أجمل.. الحرام والحلال موجودين فـ كل حاجة مش بس في الفن.. أنا حابة أكون متواجدة بين جمهوري اللي بيحبني وأي حد زعلان مني مايزعلش أنا هكون حريصة على اختيار أدواري وده اللي شاغلني دلوقتي”.

وعلقت على ما نشرته خديجة خيرت الشاطر، بخصوص علاقتها بها: “أنا معنديش صداقة قريبة مع أي حد من أي نوع.. أنا في حالي.. إحنا علاقتنا كانت من خلال مدرسة ولادي فيها لمدة سنة وممكن يكون كلامها نابع من إنها متعاطفة وأنا مش معترضة على حد.. كل واحد ليه حرية الاختيار وربنا اللي بيحاسب”، كما نفت علاقة الصداقة التي ادعتها أميرة عزت.

وعن فيديو الشيخ محمد الصاوي، الذي تحدث فيه عن حياتها الشخصية، قالت: “ارتدائي الحجاب أو خلعه مسألة شخصية، واللي عمله الصاوي ده انتهاك لحياتي الخاصة، وزوجي زعل من الكلام اللى اتقال على لسان الشيخ السلفي ده”.

وأشارت: “إحنا شعب عاطفي وأنا مقدرة إحساس بعض الناس بس براحة عليا شوية.. كل واحد ليه مراحل في حياته.. وأنا قربت من ربنا واتعلمت حاجات هتفضل معايا لحد النهاية.. الحجاب مش مقياس هو جزء من الدين لكن مش الدين كله”.