كذّب رجل الأعمال هشام ربيع كل ما قالته طليقته المطربة بوسي في تصريحات أدلت بها خلال استضافتها في برنامج “العرّافة” الذي تقدّمه الإعلامية بسمة وهبة على قناة “النهار”، مؤكداً أن كل كلامها كذب وافتراء، ويمكن أن يتسبّب في خراب البيوت.
وقال هشام في تصريحات له: “كل الردود بتاعتها عبارة عن كذب، وأنا بصراحة مقدرتش أسكت، كنت لازم أدخل، وأوضّح لكل الناس وبالذات أصحابي وأهلي أن الست دي كلامها كذب وبتتنفس كذب، سألتها الأستاذة بسمة سؤال واضح وصريح هو سبب الانفصال بينكم إيه، فردّت بوسي قالت لها أصل الناس كانت بتقوله كلام في ودنه وكلام كده لا يُعقل يعني”.
وأضاف: “أنا بعرّفكم وبقولّكم الحقيقة، طلّقت بوسي لأن دخلت بسببها السجن أربعة شهور ودفعت عشانها ملايين وخلّصتها من تشكيل عصابي مكوّن من طليقها الله يرحمه ويسامحه وعيلته وخلّيتها حرة اللهم لك الحمد، وفي الآخر الست دي مجتش زارتني خلال الأربعة شهور وفي كشوفات في السجن تثبت ده عشان هي بتكذب كتير، خرجت من السجن بتتهرب مني وقافلة باب البيت ومش عايزة تقابلني، وده اللي جاب ليا صاعقة ولاقيت نفسي هتجنن… الست دي مش قادر أفهم هي معقدة ومريضة وبتاعت مصلحتها وغدّارة، أنا مش فاهم حاجة طب أنا كهشام معملتش فيكي حاجة ومع ذلك قلت أنتي بالنسبالي غلطة وأسأت الاختيار، غلطت وإحنا بشر وممكن نغلط، وخلاص هصلّح الغلط بأني أطلّق الست دي”.
وأردف بالقول: “بوسي اعتبرت إن شهامتي ورجولتي أنا عملتها مع واحدة في الشارع أو مع جارتي أو أختي أو زوجتي، ودي تربيتي عشان أنا راجل شرقاوي وفلاّح وده طبعنا مش هشوف واحدة ست بتستغيث واسكت، ولكن الست دي طلعت ندلة جداً معايا ولا جت زارتني اللي أنا مسجون عشانها ولما طلعت من السجن قابلتني، دي اتهربت وكأن شيئاً لم يكن”.
وفجّر هشام ربيع مفاجأة من العيار الثقيل حين قال إنه اكتشف أن طليقته كانت متزوجة مرتين قبل زواجهما ولم تخبره بذلك، معلقاً: “اكتشفت حاجات غريبة أوي، وهي إن الست دي كانت متجوّزة قبلي اتنين وأنا معرفش، اللي كنت أعرفه فطين اللي هو وليد أبو ياسين، التاني اللي في النص ده أنا معرفوش”.
وأضاف: “بدأت حياتها معايا بكذب إن هي كانت متجوّزة قبلي ومقلتش ليا، حتى أنا قلتلها إزاي يا بوسي نحط إيدينا في إيدين بعض وإحنا جواز على سُنّة الله ورسوله وفرح وعيلة محترمة وأسرة ونسب، وفي الآخر إنتي متجوّزة قبلي ومقولتيش ليا طبعاً مكنش ليها رد لأن كان الموضوع اتعرف… بوسي طالعة بتقول إنها لسّه بتحبّني، طب متعرفش إن إحنا كعادات وتقاليد ومبادئ، إحنا انفصلنا واطلّقنا وكل واحد راح لحاله، طيب متعرفش إن بحبّك دي تخرب بيت وده اللي حصل عندي فعلاً، حصل مشاكل في بيتي، هل هي عايزة تخرب بيتي؟”.
واختتم هشام ربيع حديثه قائلاً: “أنا معملتش حاجة لبوسي، كل اللي عملته إني دافعت واتسجنت ودفعت ملايين عشان خاطرها، وفي الآخر طلعت ندلة ومش جدعة ومش عايزة تعترف بكده، يعني هي كمان ناكرة للجميل ليه اللفّ والدوران في كلامك بالبرنامج، بدأت أصدق كل الكلام اللي كان بيتقال عنك قبل كده بعد اللي عملتيه معايا… موضوع بحبّك دي تخرب بيت وفي أسرة وأولاد، طب ليه تدمريلي حياتي أنا عملت فيكي إيه؟ بقولك الله يسهّلك إحنا في شهر كريم ومش عايز أتكلم في أي حاجة أكتر من كده مع إن عندي كلام كتير عايز أقوله بس مينفعش عشان مخضش في أعراض ومدخلش في حاجات هخلّي كل حاجة لوقتها ولكن الله يسهّلها ربّنا يهديها”.