كشف النجم أحمد حلمي كواليس فيلم “عسل أسود” الذي عرض في السينما عام 2010.
قال حلمي: “فيلم (عسل أسود) منى زكى قالت لي إنى مش هاينفع أعمله، ومكنتش مقتنعة عشان إن ده شخص عايش في أمريكا لأكثر من 20 سنة، وأنا معيشتش هناك فمش هاعرف أعمله وكمان اللغة، وذلك أثناء استضافته في برنامج Sold Out الذي يقدمه الإعلامي محمود سعد عبر شاشة cbc.
وتابع: الفيلم كان المفروض يعمله عمر الشريف، وأنا كنت هابقى موظف في شركة، ولكن لما قرأت السيناريو، قلت لخالد دياب إيه رأيك نخليه أكتر عن الشباب، ونلقي نظرة عن الشباب اللى هاجر بره، وفكر في الموضوع وقال لي ممكن نعمل كدة وبدلنا السيناريو.
وأضاف: كل شيء كان يقول إنى منفعش ولا شكل ينفع ولا لغة تنفع ولا تفكير شخص يكون عايش سنين في أمريكا، وقعدت مع واحد مصري كان عايش في أمريكا اسمه آدم، واستعنت بيه في قراءة السيناريو واقول له على المواقف في السيناريو، وأشوف رد فعله وموقفه إيه لو حصل له حاجة من الموجودة في السيناريو، وعشان كدة الفيلم بيعبر شوية عني لإني عيشت بره مصر فترة كبيرة بعيد عن بلدي.
وفيلم “عسل أسود” يحكي قصة مصري هو شاب هاجر لأمريكا مع والديه وهو في العاشرة من عمره، وبعد 20 عامًا يعود رغبة في الاستقرار، ويواجه العديد من المفارقات الناتجة عن اختلاف الزمن والثقافات حيث يحمل جواز سفر أمريكي وهو ما يجعل الجميع يتعامل معه معاملة حسنة إلي أن يتعرض لحادث يفقد فيه الجواز فتتغير معاملة الجميع إلى النقيض.
الفيلم بطولة أحمد حلمي وشاركه البطولة إدوارد وإنعام سالوسة ولطفي لبيب ويوسف داود وأحمد راتب وإيمي سمير غانم، ومن تأليف خالد دياب، وإخراج خالد مرعي، وإنتاج عام 2010.
وتطرق الحوار لفيلمه “آسف على الإزعاج”، وقال عنه: “مرتبط شوية بمشاعري تجاه والدى الله يرحمه، وحاسس إنى ملحقتش أقعد معاه وقت طويل، ويمكن لما بتمثل حاجة أنت عيشتها بتقدر تعبر عنها بصدق عشان بتكون عيشته وحسيته”.