عبر الإعلامي عمرو أديب عن استيائه من حملات المقاطعة للماركات العالمية مشيرا إلى أن هذا الأمر سيضر بالاقتصاد المصري والعمالة المصرية.
وخلال حلقة أمس من برنامج “الحكاية” الذي يعرض عبر MBC مصر، قال عمرو أديب “شركات ماكدونالدز وستاربكس متأثرتش بالحملات لكن الأسهم بتاعتهم طالعة، لكن اللي بيحصل إن الشركات اللي في مصر مش هتدفع ضرايب ولا نور وكهربا علشان الخسارة ملايين بتترمي في الأرض وكل دا عشان مين؟!!
وأضاف عمرو أديب “الموبايل ليه محدش بيستغنى عنه والأدوية المستوردة والبنزين اللي عاملين عليه مناحة 20% منه مستورد بنستورد البنزين من برة لكن هو المنظر مش هروح ستاربكس وهو مين كان بيروح ستاربكس أصلا؟!… هل مستعدين تكملوا للآخر، محدش هياخد مننا حاجة”.
وخلال الحلقة قال عمرو أديب ” أزعم إني من أوائل الناس اللي حذرت من موضوع المقاطعة والخبر الحلو إن المقاطعة ماشية كويس مش في مصر بس لكن في دول كتير، الناس بقت تتكسف تتواجد في الأماكن دي بقا في إحساس بالمسئولية ورفض”.
وأضاف عمرو أديب ” والخبر الوحش إن المقاطعة دي مش واصلة خالص لأصحابها، فاللي بتقاطعه مش هنا وانت مش بتمثله غير شيء رمزي واللي بيتأثر المواطن المصري”.
وتابع عمرو أديب “المبيعات قلت في في شركات ومطاعم فبالتالي هيمشوا ناس والغلابة منهم والناس دي بتمشي ومبترجعش تاني والكلام دا بيحصل في وضع اقتصادي مؤلم وفي ناس كانت بتشتغل بالمكافأة والبقشيش الناس دي مين هيقف جنبهم الدولة متقدرش لأن دي آخر مشاكلها”.
واختتم عمرو أديب : “أنا مقدر مشاعركم علشان نقف جنب الفلسطينيين.. طاب مين هيقف جنب المصريين”.
يذكر أن انتشرت عبر وسائل التواصل الاجتماعي حملات لمقاطعة كل المنتجات التي أعلنت دعمها لاسرائيل جراء الحرب على غزة، واستبدال هذه المنتجات بأخرى مصرية.