أعلنت الفنانة حورية فرغلي عن تعاقدها على فيلم سينمائي جديد يحمل اسم “ديجافو” وقالت خلال فيديو لها نشرته على حسابها بموقع انستجرام أنه من أصعب الأدوار.
قالت حورية فرغلي “النهارده طالعة مخصوص علشان أقولكم خبر وهو أحلى خبر بقالي كتير ما انبسطش زي النهارده”
وتابعت “الحمدلله أنا لسه ماضية فيلم اسمه ديجافو مع المخرج عيد العربي، والمنتج أيمن فهمي، ودول إسكندرانية بلدياتي”
واضافت “يمكن تستغربوا اشمعنا دلوقتي اشتغلت سينما، بصراحة كان معروض عليا حاجات كتير بس ملقيتش أي حاجة جديدة، أنا عملت شخصيات كتيرة وقصص كتيرة، بس معملتش الدور ده قبل كده وهو من أصعب الأدوار اللي هعملها في حياتي”
وكانت سابقاً قد أعلنت الفنانة حورية فرغلي عن تبرعها بكامل أرباح مشروعها لدعم أهالي غزة.
نشرت حورية فرغلي فيديو على حسابها بموقع Facebook قالت فيه “استنوني يوم 26 أكتوبر في بازار مع صديقتي وكل أرباحه هتروح لأهل غزة”
تضامنت حورية فرغلي مع الأحداث الجارية في غزة ونشرت فيديو قالت فيه “أنا بعمل الفيديو ده تضامن مع شعب فلسطين الحبيب وقلبي كله حزن وبيتقطع من اللي أنا بشوفه، ويا رب فك كربهم وينصر أهلنا في فلسطين”
وأضافت ” الأطفال اللي بيموتوا مش ذنبهم حاجة والناس مش ذنبها حاجة اللي بتروح ضحايا من غير ما تعمل أي حاجة، معقولة الناس تروح ضحايا حد عمل حاجة غلط هما ذنبهم إيه الناس دي تموت، يعني انتوا بتحاسبوا شعب بسبب فئة غلطت حرام الناس اللي بتموت دي يا جماعة.”
وتابعت “أنا مليش في السياسة خالص ولا بتكلم فيها بس والله العظيم لأول مرة، لازم جامعة الدول تتكلم وتعمل حاجة واحد يحاسب البلد كلها، وحرام الأطفال اللي بتموت دي اللي مش ذنبها إنها جت الدنيا تخرج وتدخل الدنيا بمزجنا إحنا، بصراحة أنا حزينة جدًا جدًا وبشوف الفيديوهات بتقطع وساعات مش بقدر أكملها بس لازم يكون فيه حل، ولازم الناس اللي تقدر تحل تحل بجد حرام اللي بيحصل ده وأنا بدعي ربنا إن الموضوع ده ينتهي.”
يذكر أن حورية فرغلي شاركت في فيلم “حملة فرعون”، الفيلم من بطولة روبي، عمرو سعد، محمود عبد المغني، محمد لطفي، سوزان نجم الدين وغيرهم نخبة من النجوم. الفيلم من إخراج رؤوف عبد العزيز.