كشفت الفنانة منة شلبي تفاصيل خلافها مع الفنانة هند صبري، في وقت انطلاقهما بالسينما.
وخلال لقائها في برنامج “سهرانين” مع الفنان أمير كرارة قالت منة شلبي إن علاقتها بهند صبري لم تكن جيدة في بداياتهما الفنية مضيفة “:مكنش لينا في بعض أوي، مكنش فيه خناق، بس مكنش فيه حب”.
وتابعت منة شلبي “طلعنا احنا الاتنين مع بعض كانت هي بتعمل فيلم مواطن ومخبر وحرامي ومذكرات مراهقة، وانا كنت بعمل الساحل وبحب السيما، وادوارنا كانت جريئة في الفترة دي”.
واستكملت منة شلبي “في الفترة اللى انطلقنا فيها انا وهند صبري كان يجي حد يخلينا نسخن على بعض ويقولي دي متبحبكيش وانا اقول دي مبتحبنيش ازاي يعني ويقولها نفس القصة، وبعدين اشتغلنا مع بعض فيلم أحلى الأوقات، وكل واحدة فينا كانت كتفها كان عالي علي التانية، بس محترمين، وكان وسطنا أعظم حكم حكم ست البنات حنان ترك”.
وتابعت:”برغم اني انا وهند صبري مش قريبين من بعض بس كان فيه ود شديد صنعته حنان ترك لإنها كانت قريبة مننا احنا الاتنين”.
واختتمت :” خلص فيلم احلى الأوقات لا حرب ولا سلم ومفيش حاجة، وبعدين جالنا فيلم بنات وسط البلد، فالمخرج محمد خان كلمني فوافقت وقلت له مفيش مشكلة وروحنا نعمل بروفة قراءة عنده في البيت بالمعادي واحنا بنفتح النسخة بصيت لهند صبري وقلت لها فيه كلام عايزة اقولهولك وهي كمان قالت لي وانا كمان وعرفنا ان فيه شوية ناس استغلت شوية تفاهة وصنعوا المشكلة ما بيننا ولكن فيه احترام لرحلتنا وشقانا وتعبنا وجرأة في الأعمال عن حب شديد للشغلانة، وتفاهمنا وانتهى سوء التفاهم اللي بينا واتصافينا”.
وكشفت الفنانة منة شلبي كواليس لأول مرة عن فيلم “الساحر” الذي يعد إنطلاقتها الفنية في عام 2001.
وخلال لقائها مع برنامج “سهرانين” مع الفنان أمير كرارة قالت منة شلبي “أنا عذبتهم في تصوير فيلم الساحر، لأني مكنتش بعرف أمثل، وتمثيلي كان زي الزفت، لدرجة كنت بقف قدام أستاذ محمود عبدالعزيز وأقف ساكتة مقدرش أتكلم، ومكنتش بعرف أنطق وبتكلم في سري ومش فاهمة الكلام.. وكنت بخرج غلط من اللوكيشن”.
وأضافت منة شلبي: “أنا كنت كارثة في فيلم الساحر، وزمان كنت تخينة وبحب الأكل جدًا، وخسيت شوية فخدوني وخلاص بعدها رجعت تخنت تاني، لدرجة إن أستاذ رضوان الكاشف كان بيقولي هو أنا بصور فيل؟ وأنا كنت أقعد أعيط، وبالمناسبة أنا لسه بحب الأكل لحد دلوقتى بس هذبت نفسي”.
وتابعت منة شلبي: “أنا مكنتش مصدقة إن دوري كبير، لدرجة لما شفت السيناريو قولت لأستاذ رضوان، حضرتك متأكد إني بعمل دور نور”.
ونافست منة شلبي في رمضان الماضي بمسلسل “تغيير جو”.
وتدور أحداث مسلسل “تغيير جو” في إطار اجتماعي تشويقي، حول شريفة التي تعاني حياتها من العديد من الأزمات، ومنها معاناة والدتها من إدمان المهدئات والكحول، بينما يقدم إياد نصار شخصية دكتور جامعي وتجمعه علاقة مع منة شلبي، وتقدم ميرفت أمين دور خالة منة شلبي واسمها زوزو.
ويشارك في بطولة مسلسل “تغيير جو” إياد نصار وأحمد مالك وميرفت أمين، والعمل تأليف منى الشيمي وإخراج مريم أبو عوف.