قال مغني المهرجانات حمو بيكا إنه لا يعرف سبب الهجوم على مطعمه الجديد في مول بالإسكندرية، واعتراض أصحاب محلات على وجوده.
وفي مداخلة هاتفية مع الإعلامي عمرو أديب في برنامج “الحكاية” على قناة MBC مصر، قال حمو بيكا: “أنا فاتح مطعم اسمه سندوتش بيكا وكافيه بيكا، طبعا في براندات عالية بس كل البراندات خايفة من الاسم. أنا أول مرة أفتح حاجة وكلهم معارضين، بس أنا في المول مخالفتش أي قوانين.”
وأضاف: “المول مفيش فيه حد بتاع لبس. ده مول سيادة الريس واخد مكان على المحمودية في سموحة، مجمع كبير، فيه صف واحد مليان كافيهات والصف التاني فيه المطاعم، أنا واخد في الصف اللي فيه المطاعم.”
وتابع: “همّا بيقولوا حمو بيكا لو فتح مش حناكل عيش، ميعرفوش إن اللي بيقسم الأرزاق ربنا.”.
وكشف مؤدي المهرجانات حمو بيكا عن مواظبته على حضور كورسات لتعلم الغناء، في إطار سعيه لدخول نقابة المهن الموسيقية.
وفي مداخلة هاتفية مع الإعلامي عمرو أديب ببرنامج “الحكاية” على قناة MBC مصر، قال حمو بيكا: “أنا قدمت كل ورقي وكل حاجة للنقابة، ومستني لجنة في اليومين الجايين.”
وأضاف: “باخد كورسات كل يوم عند واحد اسمه أستاذ محمد، بيعلمني النفس إزاي، وإن أنا أعرف أغني وأحفظ المقامات والذي يساعدني مطرب من لبنان.”
وتابع: “باقول لكل جمهوري أنا مش مطرب، لكن أنا راجل مؤدي وكل جمهوري بيبقى فرحان وأنا موجود، وحرام مطلعلهمش.”