تحدث هاني شاكر عن أغنيته الجديدة “كيف بتنسى” التي سيقدمها باللغة اللبنانية، والمقرر طرحها خلال يومين على قناة يوتيوب الخاصة به، ومن ألحان الفنان وليد توفيق، حيث قال: “أنا بحب الشام أوى وبقالي فترة بكلم وليد عشان أعمل أغنية، أنا بحبه أوي واحنا أصحاب، وليد توفيق من الناس اللي تتحب”.
وعن المنافسة قال شاكر: “مافيش حد بينافسني كل فنان بيقدم الفن الخاص به أنا مش بعترف بموضوع المنافسة دي، ممكن أستفز فنياً من حد عمل أغنية ناجحة.. كل واحد بيقدم شكله وروحه وفنه يبقى ليه الغيرة أغير لو أنا مش ناجح.. في يوم أمي قالتلي طريق الفن ده صعب أوي أوعى تيأس أو تحس بالإحباط”.
وفي سياق آخر قال شاكر أن الأغاني اللي بتعتمد على الإفيهات هتتنسى قائلا: “الأغاني اللي بتتعمل بسرعة بتتنسى بسرعة وبتفضل الأغاني اللي بتلمس المشاعر” وعن أغنية ” على الضحكاية” قال شاكر ” مافيش حفلة بتعدي من غير ما أغنيها دي trade mark” .
كما كشف المطرب هاني شاكر أنه كان يحاول التركيز على الأغاني الدرامية، والتي كان لها دور كبير فى صناعة نجوميته، بعدما شعر أن الجمهور يطالبه بهذا النوع من الأغاني، وذلك في تصريحات له خلال برنامج ” كلمة أخيرة” مع الإعلامية لميس الحديدي على قناة On .
وعن التباعد والعزل المنزلي بعد انتشار فيروس كورونا، قال: “الواحد عرف معنى نعمة الخروج والسفر بعد انتشار فيروس الكورونا والله السفر وحشني”.
وأضاف هاني أنه أقام حفلين خلال فترة الفيروس واحدة online والأخرى بمهرجان الموسيقى العربية، قائلا: “بس حفلات الـ online صعبة أوي ربنا يكون في عون فرق الكرة لما بتلعب من غير جمهور صعب أفضل بغني وانا باصص في كاميرا مش حاسس بتفاعل الجمهور”.
وعن لقاح فيروس كورونا قال شاكر: “أنا حابب استنى شوية قبل ما اخد اللقاح، الصراحة مجهودات وزارة الصحة غير مسبوقة في الأزمة دي”.
كما اعتبر هانى شاكر الأطباء والممرضين خط المواجهة مشيرا أنهم يعتبرون أبطال 2020، وعن أفضل الأغانى التى سمعها خلال العام قال ” أغنيتين لعمرو دياب يوم تلات وقدام مرايتها، وعمرو من انجح المطربين، وعجبتنى كمان أغنية لقيت الطبطبة لحسين الجسمي”.
وعن الغناء فى العالم العربى خلال ٢٠٢٠ قال شاكر: “2020 ماكنتش من السنوات اللى فيها عطاء فنى نتيجة الظروف اللي مرينا بها دا غير الصراع بين الناس اللي بتنادي بالقيمة والناس اللى فاكرة الفن دا لقمة عيش”.
وأضاف: “أنا بشوف المهرجانات أقل من الغني الشعبي عشان كدا قلت لعمر وشاكوش وغيرهم خلى في بالكم دايما الناس هل يصح نقول خمور وحشيش في أغنية.. المشكلة دلوقتى في السوشيال ميديا اللى نشرت كل حاجة بشكل مش طبيعي… المشاهدات بقت تتحكم في كل حاجة.. مافيش مشكلة نسمع مهرجان لكن على الأقل يبقى في اهتمام بكل نوعية.. ممكن نقدم اي حاجة خفيفة ونفس رتم أغاني المهرجانات بس نختار الكلام شوية”.
وعن أغنية “يا بخته” قال هاني شاكر: “الأغنية عجبتنى أوي أول ما أحمد بعتهالي، رغم أن أحمد سعد كان مغنيها لوحده بس قولتله تعالي نجرب رغم اني كنت خايف من الخطوة لان الأغنية جديدة عليا.. عشان كدا كنت بحاول أقلد احمد سعد عشان اعرف اغنى شعبي زيه”.
وأضاف: “انا اتفاجئت من نجاح الأغنية والمشاهدات، وحسيت إني عملت حاجة كنت بتمناها”، مضيفا: “الأغانى الشعبي مش أقل من الغني العادي احنا اتربينا على الغنى الشعبي”.