تأثر الفنان مصطفى كامل بلحظة إعلان فوزه نقيبًا للمهن الموسيقية بالتزكية، إلى حد البكاء، منذ قليل، في مؤتمر صحفي أقامه لإعلان كافة تفاصيل انتخابات نقابة المهن الموسيقية في بداية شهر أغسطس المقبل.
وقال مصطفى كامل خلال المؤتمر الصحفي منذ قليل: عايز أشكر كل زملائي أعضاء الجمعية العمومية بلا استثناء في كل أقاليم ومحافظات مصر، شكرًا على الثقة الكبيرة دي، وطبعًا عدم ترشح أي زميل على مقعد النقيب شرف كبير ليا، مش هعرف اتكلم، لو اتكلمت الواحد هيبكي.
وأضاف: ألف شكر على عدم الترشح، لكن الاتصالات اللي جاتلي من كبار موسيقيين مصر اللي هما اخواتي وحبايبي شكرا على كل الدعم، دي ثقة كبيرة جدًا يا رب يكون الواحد قدها.
وتابع مصطفى كامل: النهارده عامل الاجتماع ده للسادة الزملاء.. كل المرشحين زملائي على عضوية مجلس الإدارة نورتوا وشرفتوا ربنا يديكم على قد نيتكم ويقدركم على عمل الخير.
وجه الفنان مصطفى كامل نقيب المهن الموسيقية، رسالة شديدة اللهجة لجميع المرشحين على منصب عضو مجلس إدارة نقابة الموسيقيين، موضحًا إنه لن يسمح بوجود أي فساد في النقابة.
وقال مصطفى كامل خلال المؤتمر الصحفي الذي أقيم منذ قليل، بشأن تفاصيل انتخابات نقابة الموسيقيين المقرر إجرائها في بداية شهر أغسطس المقبل: إن شاء الله نجتمع على خير وإن شاء الله الـ 12 زميل يشتغلوا بقوة الـ 32 زميل المرشحين وإن شاء الله بدءً من المرشح رقم 13 وحتى 24، يفضل الأمل جوه نفسه طالما يعلم إن فيه حد دون مستوى مش موجود.
وأضاف: أنا استحملت كتير الـ 8 شهور اللي فاتوا دول عبرنا جسرنا، كنت بحتوي كل حاجة، ومَن تحدث عن أي سلبيات بقوله سامحني لو كان فيه قصور في فترتي لو كان فيه غفلة مني لأني في الآخر عبد، وأمام الله أنا لم ادخر جهد دقيقة في حياتي على مدى الفترة اللي دخلت فيها من 11/10 لحد الليلة دي، والحمد لله يقعدلي في صحة ولادي ما قدمته في الـ 8 شهور اللي فاتوا.
وتابع مصطفى كامل: احنا عندنا فترة تنازلات الأسبوع الجاي أي حد في نيته يعمل حاجة كده ولا كده، فيه فترة التنازلات من يوم الأحد ليوم التلات الجاي، أقسم بالله بقوله قصر على نفسك معايا واكتفي بإنك تتنازل عن المكان للشرفاء؛ لأنك هتخرج من معايا بشكل مش حلو، اللي هيفكر إنه داخل معايا يعمل أي مصالح هيخرج بميراث سيئ لعيلته وأنا بقولها قدام الجميع، مش بس هنقوله يلا مع السلامة ونلمها، أنا عرفت إن كان فيه قضايا فساد بتتلم في الخفاء.
مصطفى كامل: ورب الكعبة هخرجه بفضيحة اللي يفكر يعمل سبوبة
وأردف مصطفى كامل: ونجيبه ونقطع الإيصال ومعلش مش هيحصل كده ومش هنطلع عشان الجرائد ورب الكعبة لأعلن، أولًا هعلن على صفحتي وعلى موقع النقابة لما يتفعل وقدام الإعلام، اللي ناوي على كده هيخرج لابن ابنه يفضل يحكي الحكاية.
واستكمل مصطفى كامل حديثه: اللي هيقعد معايا فاسد شهر مش هيكمل شهر ويوم، مفيش فاسد هيكمل معايا بعد يتجاب بفساده، واللي مش هيحترم المقعد ده ملوش مكان بينا.