اوضح الفنان تامر حسني تفاصيل علاقته بهالة عمر، المشرفة على صفحاته في السوشيال ميديا وذلك بعد تساؤلات الجمهور بصلة القرابة بينهما!
ونشر نجم الجيل الفنان تامر، عبر صفحته الرسمية على موقع الفيسبوك فيديو من حفل الزفاف وعلق عليه قائلًا : «لكل اللي بيسأل عن إيه وجه القرابة بيني وبين العروسة الجميلة دي شايف أسئلة كتير أنا هحكيلكوا هي اسمها هالة عمر عرفتها كانت بنت من الفانز صغيرة ومن المقاتلين والمدافعين عن تامر على الإنترنت ومن كتر دفاعها عني لفتت نظري ومرة رديت عليها شكرتها ولما سافرت إسكندرية في الوقت ده لقيت بنت صغيرة أوي بتعيط وبتجري عليا وقفتلها وفكرتني بنفسها وفضلت تعيط وتقولي إحنا معاك ولازم تكمل عشان كنت بتحارب جدًا في بداياتي».
وتابع: «فاتصدمت إن اللي بتقول كده بنت صغيرة كده والمجهود ده كله اللي عاملاه بنت صغيرة عندها ١٤ سنة وقتها كانت السوشيال ميديا لسه بتطلع وكنا في شركتنا بندور على شركة كبيرة تمسكلي السوشيال ميديا لحد ما قولتلهم أنا مش عايز شركة كبيرة أنا عايز البنت الصغيرة دي هي اللي تمسكها فضلوا يقنعوني إن كده مش صح ولازم أكتر حد خبرة يمسكها وأنا قولت لا لازم أكتر حد بيحبني هو اللي يمسكها وأنا واثق أن طاقة الحب مفعولها أقوى من طاقة المحترف بلا حب فعرضت عليها تشتغل معايا وهي في السن ده مصدقتش طبعًا».
وأردف: «ومن ساعتها وهي اللي ماسكة كل شغل الميديا الطفلة الشاطرة اللي كبرت دلوقتي قدامكم هالة عمر، أما بقى عريسها العسل ده اسمه عمرو طلب أديها مني أنا عشان والدها ووالدتها توفاهم الله. في سنة واحدة رحمهم الله ياريت نفتكرهم ونهديلهم ثواب الدعاء والفاتحة ومن اللحظة دي إتحولت هالة لبنتي الكبيرة بجد اللي بتتجوز دلوقتي قدامي وبسلمها لعريسها بنفسي وبغني في فرحها، معرفتش أرد على كلامك عني في الفرح يا هالة رديت دلوقتي هنا ربنا يكرمك ويسعدك مع جوزك الجميل المحترم اللي هيكون ضهرك وسندك ويكمل معاكي مشوار حياتك مع أولادكم الجُمال بإذن الله».