كشف عثمان بدران، الصديق المقرب للمخرج أحمد ثروت عن تطورات الحالة الصحية له، بعد إصابته بمتلازمة “الميلر فيشر”.
وكتب صديق أحمد ثروت، عبر حسابه الشخصي بموقع التواصل الاجتماعي Facebook: “أحمد ثروت زميل صنعة زي ما بيقولوا، ومن شوية ضغط في الشغل في خلال السنوات اللي فاتت، جات له جلطة في عينه الشمال، والحمد لله بتتحسن ولكن تطور الموضوع أكتر، وجه له مرض في الأعصاب نادر أوي اسمه متلازمة الميلر فيشر”.
وأضاف: “وده مرض بيجي 1٪ في المليون، بيخلي الجهاز المناعي يهاجم الجهاز العصبي، وحاليًا مأثر على رجله الشمال تمامًا، واليمين بنسبة 50٪ زي ما أحمد قال لي والحمد الله عزيمة أحمد في حتة تانية خالص، وبيهزر وبيضحك ومؤمن ومبسوط أن ربنا اختصه”.
وتابع صديق أحمد ثروت: “بس النهاردة يوم مهم جدًا، أحمد سافر لألمانيا، علشان المرض ده محتاج مركز متخصص لعلاجه، والنهاردة هيسحبوا عينة مياه من المخ، علشان يحددوا الموضوع أكتر، ويحطوا بروتوكول للعلاج بإذن الله”.
واختتم: “بناء على نتيجة النهاردة، هيتحدد حاجات كتير أوي، فضلًا وليس أمرًا ندعي لأحمد، لعلكم أقرب إلى الله أنه يشفيه، ويهون عليه ويربط على أبوه الخلوق الجميل، وأمه وأخته وخطيبته”.