عبر الإعلامي عمرو أديب عن استيائه من الشائعات التي تطارد النجم عادل إمام وآخرها إصابته بالزهايمر.
وقال عمرو أديب خلال لقائه مع et بالعربي على هامش حضوره احتفالية افتتاح المقر الرئيسي لمجموعة MBC في الرياض: أحنا ليه مش عاوزين الناس تبقى في سلام، دا عادل إمام دا الزعيم عايزين منه إيه، دي مش محبه واطمئنان دا فضول قاتل وأغلب الهاشتاجات تشفي، التيارات الدينية اللي بتكره عادل إمام تشفت فيه وما صدقوا على الخبر ده والناس اللي قالت عليه الكلام دا رجعت قالت لا إحنا بنحبه ومنقصدش.
وتابع: أنتوا عايزين منه إيه الراجل اللي أسعدكم مستكترين عليه أنه يبقى سعيد وهادي في حياته توحش الناس بقت متوحشة سيبوا الناس في سلام.
وأكمل: خليه في حاله سعيد ومبسوط في الصورة دي، لما جت ليلى مراد قررت مش هتغني تاني قالت مش عايزة اتصور مش عاوزة حد يشوفني عايزة الصورة دي تفضل، دا بني آدم ليه عيله وأخوات وحياة دا ميستحقش منكم هذا التكريم والاحترام لحياته ارحموا الناس بلاش جنان.
وكان المنتج عصام إمام طمأن الجمهور على صحة شقيقه الفنان عادل إمام.
وعبر عصام إمام عن غضبه وحزنه من كثرة الشائعات التي تنتشر كل فترة على شقيقه الزعيم عادل إمام وقال في مداخلة هاتفية مع الإعلامي عمرو أديب في برنامجه “الحكاية”: أنا مش عارف الناس دي مستعجلة على إيه، إيه سبب أن يتقال كده، دا عادل إمام لو فيه حاجة ولو في مستشفى العالم كله هيعرف.
وتابع: ليه أستاذ محمد الباز ودا راجل إعلامي كبير ممكن يتحرى من الخبر، لو في حاجة الكل هيعرف، أنا جالي مكالمات من أمريكا وأستراليا من ناس أنا معرفهمش بيسألوا، أنا برد على حاجة تخص الأسرة ولما يقولوا أن عادل إمام تعبان وفي مستشفى لازم أرد لكن أنا زهقت.