حلت الفنانة اللبنانية كارول سماحة ضيفة على محطة راديو إنرجي 92.1، اليوم في حلقة خاصة مع باسم كميل ومنة عامر وتحدثت عن الكثير من اعمالها المقبلة وعن الاغنيات الاقرب اليها وعن مشوارها الفني، وعلاقتها بمصر التي تقيم فيها منذ سنوات بعد زواجها.
وابرز تصريحاتها خلال الاستضافة:
-بتكسف جدًا من الألقاب.. كفاية إني أبقى فنانة محبوبة.
-فكرنا إن أغنية “يا شباب با بنات” بتعبر عن كل الفئات.. المرتبطين واللي مش مرتبطين
-مش كل الناس لازم تتجوز.. ممكن يكون الإنسان مؤثر في المجتمع من غير ما يكون متزوج
-اخترت أقدم أغنية “المطلقة” لأن المرأة العربية المطلقة صرخة.. حبينا نكسر فكرة إن الموضوع ده محدش بيتكلم عنه.. مهم الترفيه يكون موجود في الأغاني لكن مهم كمان وجود رسالة
-صورت كليب أغنية جديدة في أسطنبول وهتنزل في 2022.. الأغنية موضوعها بيعبر عن كل الفوضى والزحمة اللي في حياتنا
-بقيت اهدى وبالي أطول وأقل عصبية بعد الزواج
-د. وليد مصطفى زوجي طلب مني الزواج بأغنية “أول ما قابلتك”.. فاجئني في مطعم واشتغلت الأغنية وطلب مني الزواج
-اتأثرت جدًا بماجدة الرومي في فترة مراهقتي
-أكتر صفة إيجابية بيقولوا إنها موجودة فيا هي الوفاء وإني بحب أبسط اللي حواليا
-تقديم كليبين متصلين لأغنية “شكرا” كانت فكرة المخرجة بتول عرفة.. والفنان هاني شاكر تحمس جدًا للفكرة قبلي
-المخرجة بتول عرفة ذوقها عالي في المزيكا.. وبتقدر تاخد الأغاني في الكليبات لأبعاد تانية
-صديقتي إلهام شاهين شخصية جدعة وشفافة جدا ودايما بتقف مع أصحابها بشراسة
– ألبوم “كريسماس كارول” بفكر فيه من فترة طويلة لأني مكنتش عايزة يكون فيه تكرار أو ملل.. والألبوم ده مع الوقت هيرجع ينتشر أكتر
-سحبت صوتي من أغنية فيلم “توأم روحي” بسبب عدم إتفاق وجهة نظري مع موزع الأغنية.. انسحبت بكل ود وحب
-أرهقت جدًا في مسلسل “الشحرورة” بسبب تقديم كل الفترات العمرية.. لو رجع بيا الزمن مكنتش هعمل أول فترة عمرية كنت هبدأ من بعدها
-بعشق التمثيل.. وبيجيلي عروض لتقديم مسلسلات لكن مش كتير بسبب التخوف من لهجتي رغم إني بتقن اللهجة المصرية لإني في المقابلات بتكلم لبناني
-أكتر أغنية حبيتها ليا في 2021 هي “شكرًا”.