علقت الفنانة إلهام شاهين على حالة الجدل التي تصنعها الإعلامية ياسمين عز، عبر برنامجها كلام الناس، المذاع عبر قناة إم بي سي مصر، واستفزازها للمشاهدين، بالدفاع المبالغ فيه عن الرجال في محاولة منها لتصدر التريند.
وحينما سؤلت إلهام شاهين، عن ياسمين عز، ردت في تصريح لـ”أهل مصر”، على هامش تكريمها بمنتدى الحياة للثقافة والفنون، مساء اليوم: “أنا معرفهاش، والإعلام والصحافة بتعيد كلامها ولما بيتعاد بيتعملها دعاية كدا”.
وتابعت إلهام شاهين قائلة: “ياجماعة اي حاجة مش عجبانا في المجتمع منروجلهاش هتتنسي وهتهدا وتموت، طول ما أحنا بنقعد نتكلم فيها طول ما أنتوا فاتحين الموضوع، التجاهل أحسن شيء”.
وعن تخصيص ياسمين عز محتوى برنامجها للحديث عن الرجل ومميزاته وتجاهل دور السيدات قالت إلهام شاهين:” مبتابعش الكلام دا، ومعرفش مين دي، باين عليها واحدة بتكره أنوثتها ليه الراجل مايحطش الست تاج على رأسه، ليه الراجل تاج على راسي، مانا كمان تاج على رأسه يا جماعة هي مش خناقة بين الراجل والست علشان نقول مين يعمل لمين ومين يهتم بمين؟، هما الأتنين لازم يهتموا ببعض لازم يحترموا بعض، ويكونوا قيمة جميلة في حياة بعض وبينهم ومودة ورحمة وسكينة”.
تحدت الفنانة إلهام شاهين إن المشاكل التي تواجه السيدات في المجتمع، وذلك خلال حضورها فعاليات منتدى الحياة للثقافة والفنون، قائلة في تصريح: “المشاكل اللي بتتعرض لها السيدات كتيرة جدا، ومنها التحرش خصوصا أنه مش لازم حد يلمسك عشان يبقى تحرش، لأنه في تحرش لفظي، والسوشيال ميديا وقرفها والكلام والتعليقات السخيفة اللي ناس بتقولها على أي واحدة، لمجرد إنها مش محجبة فتلاقي تعليقات سخيفة عليها لما تنزل اي صورة”.
وأضافت إلهام شاهين: “في مناطق فيها جهل شديد مبيعملوش البنات من صغرهم وينزلوهم يشتغلوا أي حاجة، واللي بيخلف 15 عيل دول، الله لا يسامحهم، لأنهم بيئذوا أولادهم جدا سواء ولد أو بنت يخلفوهم، وهما مش ناويين يعلموهم أصلا فبيطلعوا إيه للمجتمع؟! فالأب يقولك هما يشتغلوا ويصرفوا عليا، يعني أب عايز يبقى بلطجي فيخلف عيال عشان يبلطج عليهم، العيال تشتغل من وهما أطفال، أب زي ده لازم يتعدم حرام يعيش، الأطفال دول ملهمش ذنب”.