كشف الفنان المصري محمد منير، خلال لقائه مع الممثلة المصرية إسعاد يونس، فى برنامج “صاحبة السعادة”، المذاع على قناة dmc، قصة عمل أغنية “علّي صوتك بالغنا” من فيلم المصير.
وقال محمد منير: “يوسف شاهين وكمال الطويل كان مش عاجبهم الغنا، وكل ما أغنى أسمع غلط ومقدرش أعترض عليهم ولا أتخانق معاهم، وقلت أضرب شاهين ولا أعمل إيه روحت عيطت وده خبث منى ولؤم، ولما شافوا الدموع نازلة من عينى سابوا لى الاستوديو، خلصت الأغنية فى 5 دقائق، معروف عنى فى وسط الاستوديوهات ومهندسى الصوت إنى أسرع وأشطر مغنى، لأنى بأروح مذاكر.”
وأضاف منير: “بحب شخصية مروان اللى قدمتها فى فيلم المصير؛ لأن الشخصية كانت قريبة منى ومن شخصيتى، وكان مع حبيب قلبى الراحل نور الشريف وصديقى محمود حميدة وصفية العمرى ربنا يديها الصحة”.
وكشف ايضاً، عن أول أعماله السينمائية فيلم “حدوتة مصرية” عام 1982، وكواليس الفيلم مع المخرج الكبير يوسف شاهين والنجمة يسرا، وقال محمد منير: “أول فيلم عملته عام 1982 كان فيلم “حدوتة مصرية” وكان مع حبيبة عمري وأختي النجمة يسرا، وكانت نحيفة وأنا نحيف وكان عاملنا مشاكل في التصوير، وعملت أغنية تاريخية “حدوتة مصرية”، ويوسف شاهين عظيم، كتب على قبره كلمات أغنية حدوتة مصرية.
وفي تقرير مصور خلال الحلقة للنجمة الكبيرة يسرا قالت خلاله: “أنا ومنير بنشبه لبعض بنحب صحابنا وجدعان أوي وطيبين وأول مرة نلتقي ببعض عن قرب كان في “حدوتة مصرية” وهو أول فيلم لمحمد منير، وكان قلقان أوي، وإحنا عشرة عمر من الثمانينات، وممكن ييجي على نفسه عشان صحابه، وكان تعبان جدا لما جه عزاني في أمي، ومش هنسى له الموقف ده أبدا، وفيه مواقف كتير بينا مش هقدر أحكي عنها، ومنير أخ وصديق وعزيز وغالي عليا أوي وسلامة قلبك يا أبو قلب طيب، وبحبك وبحترمك وغالي عليا أوي وعلى كل المصريين، وربنا يحفظك من كل شر ويديك الصحة والعافية”.
وأضاف الكينج محمد منير: يوسف شاهين كان بيعتبرني حنجرته وصوته في الأفلام، ولو كان عاوز يزعق لحد يزعقلي، ولو عاوز يشتم حد يشتمني أنا، وكان بيعمل كده معايا من أول حدوتة مصرية.