كانت الفنانة راندا البحيري، من نجوم الجزء الثاني، والتي شاركت في العمل مع المخرج تامر حمزة، ولاقى دورها استحسان الجمهور، وتروي راندا عبر حسابها على “إنستغرام” كواليس تصوير أحد المشاهد الأخيرة لها في المسلسل، وتحديدا 18 ثانية من الحلقة رقم 56 بالجزء الثانى للمسلسل، حيث نشرت فيديو من كواليس تصوير المشهد.
وقالت راندا، “الـ 18 ثانية دول من كواليس تصوير مسلسل الأب الروحي.. المخرج الأستاذ تامر حمزة، قالي أنام في المياه.. قفلت عيني ومكنتش سامعة اي حاجة برة علشان صوت المياه اللي بتنزل من فوق كان عالى جدااااا.. ده غير أن البوكس الإزار ده مقفول عليا من فوق”.
وأضافت “قفلت عيني علشان ياخدوا الشوط اللي عايزينه.. وخدوا الشوط اللي عايزينه.. وبعدها الأستاذ تامر بينادى (فتحى عينك يا راندا.. فتحى عينك يا راندا.. خلاص يا راندا خلصنا)، وأنا مبردش أنا أصلا مش سامعة أي حاجة”.
وتابعت “الأستاذ تامر افتكرني موت أو دايخه.. أو إن أي حاجة حصلتلي.. واترعب عليا خاف على خوفي قسما بالله مشوفتهوش قبل كده.. جرى وقعد يصرخ ويزعق في كل الناس علشان يلحقوني.. وهو شخصيا جرى وجاب السلم وأول ما عرف إني صاحية وشافني قدام عينه بصلي.. حط إيده على وشه وعيط وبعدها فضل دقيقة قاعد على الأرض بيجمع نفسه من الخضة.. على فكرة أنا كان بقالي شوية قبل زمن الفيديو ده مبردش عليهم خالص علشان كده الخضه كانت كبيرة”.
واستطردت “أنت يا أستاذ تامر يومها كبرت في نظري أوي أوي أوي.. وعرفت أد إيه أنت بتخاف على الممثل بتاعك وبتحبه بجد.. ياريت البني آدمين كلهم طيبين زيك.. وأنا سعدت واتشرفت أن في الـcv بتاعى اتكتب أني اشتغلت معاك.. شكرا على الروح اللي شوفتها في اللوكيشن بتاعك يا أستاذ تامر وشكرا على وقوفك جنبي ودعمك ليا”.